सरल वास्तुतज्ज्ञ चंद्रशेखर गुरुजी यांच्या हत्या प्रकरणात एक धक्कादायक खुलासा
![A shocking revelation in the murder case of simple architect Chandrasekhar Guruji](https://mahaenews.com/wp-content/uploads/2022/07/A-shocking-revelation-in-the-murder-case-of-simple-architect-Chandrasekhar-Guruji.jpg)
कर्नाटकः सरल वास्तुतज्ज्ञ चंद्रशेखर गुरुजी यांच्या हत्या प्रकरणात एक धक्कादायक खुलासा करण्यात आला आहे. या हत्या प्रकरणातील दोन्ही आरोपींना अटक करण्यात आलं असून बेळगाव जिल्ह्यातील रामदुर्ग येथे पोलिसांनी ही कारवाई केली आहे. यावेळी चंद्रशेखर गुरुजी यांच्या हत्येमागील कारण पोलिसांच्या तपासात स्पष्ट झालं आहे.
कर्नाटकच्या हुबळीमध्ये एका हॉटेलमध्ये दुपारी चंद्रशेखर यांची निर्घुण हत्या करण्यात आली होती. चंद्रशेखर यांची हत्या का करण्यात आली याचा तपास पोलिस घेत होते. चंद्रशेखर गुरुजी यांच्या हत्येमागे ५ कोटींची मालमत्ता विकल्याचा संशय पोलिसांनी व्यक्त केली आहे. अनेक दिवसांपासून बेनामी मालमत्ता विकून पाच कोटी देण्यासाठी चंद्रशेखर यांच्यावर दबाव आणला जात होता, असं पोलिस तपासात उघड झालं आहे.
चंद्रशेखर यांचा बहुतांश व्यवसाय आरोपी महांतेश शिरुरु पाहत होता. चंद्रशेखर यांनी कोट्यवधी रुपयांची मालमत्ता त्याच्या नावावर केली होती. तसंच, चंद्रशेखर यांच्यासाठी सर्वस्व अर्पण केल्यानंतर मालमत्तेचे पैसे का द्यायचे, अशी विचारणा आरोपींनी केली होती. रागाच्या भरात मंजुनाथ आणि महांतेश यांनी चंद्रशेखर यांची हत्या केली.
शिरूर यानं चंद्रशेखर यांचा विश्वास संपादन केला होता. पण, एक मालमत्ता पाच कोटींना विकल्यावरून गदारोळ झाला. यामुळं महांतेशला नोकरीवरून काढून टाकण्यात आलं आणि याच मुद्द्यावरून झालेल्या वादातून हा खून झाला, असं पोलिस तपासात समोर आलं आहे. दरम्यान, दोन्ही आरोपींनी खुनाची कबुली दिली आहे.
कोण होते चंद्रशेखर?
वास्तूतज्ज्ञ म्हणून प्रसिद्ध असलेले चंद्रशेखर आधी कंत्राटदार म्हणून काम करायचे. त्यानंतर त्यांना मुंबईत नोकरी मिळाली. मग चंद्रशेखर यांनी वास्तूचं काम सुरू केलं. लोकांना वास्तूची माहिती देण्यासाठी त्यांनी अनेक कार्यक्रम केले. काही वृत्तवाहिन्यांवरदेखील येऊनही ते मार्गदर्शन करायचे.