महाराष्ट्र पोलिसांची मोठी कारवाई, घरात छापा टाकताच असं काही सापडलं की सगळेच हादरले
बीड : तालुक्यातील महाजनवाडी शिवारात शेतातील चंदनाची झाडे तोडून नंतर त्यातील गाभा काढून त्याची चोरटी विक्री करणाऱ्या टोळीचा पोलिसांनी पर्दाफाश केला आहे. २३ जुलै रोजी सायंकाळी सहा वाजेच्या सुमारास सहाय्यक अधीक्षक पंकज कुमावत यांच्यासह त्यांच्या पथकातील कर्मचारी यांनी ही कारवाई केली.
या कारवाईत ४९९ किलो चंदनाचा तासलेला गाभा, लाकडे वजन काटा वाकस व कुऱ्हाडी आणि बोलेरो पिकअप असा एकूण २० लाख ७२ हजार ७०० रुपयांचा माल जप्त करून एकूण १० आरोपींविरुद्ध नेकनूर ठाण्यात गुन्हा दाखल करण्यात आला आहे. या कारवाईने चंदन चोरांमध्ये एकच खळबळ उडाली आहे.
महाजनवाडी येथील एक व्यक्ती स्वतःच्या फायद्यासाठी बेकायदेशीरित्या काही इसमाच्या मदतीने शिवारातील शेतात चंदनाची झाडे चोरून तोडून, झाडांची खोडे तासून त्यातील गाभा चोरटी विक्री करण्यासाठी घरात आणून ठेवला आहे, अशी माहिती सहाय्यक अधीक्षक पंकज कुमावत यांना मिळाली होती. त्यानंतर त्यांनी खातरजमा करत सदरची माहिती पोलीस अधीक्षक नंदकुमार ठाकूर यांना कळवली. नंतर त्यांच्या मार्गदर्शनाखाली स्वतः सहाय्यक अधीक्षक पंकज कुमावत व त्याच्या पथकातील पोलीस पथकातील पोलिस अंमलदार यांनी सदरील ठिकाणी सायंकाळी सहा वाजेच्या सुमारास छापा मारला.
या ठिकाणी चंदनाची खोडे तासीत असणारा एक इसम जागीच मिळून आला. त्यास ताब्यात घेऊन नाव गाव विचारले असता एक अशोक रामहारी घरत (रा.महाजनवाडी) असे सांगितले. त्याच्या घराची झडती घेतली असता घरात ४९९ किलो चंदनाचा तासलेला गाभा आणि इतर साहित्य आढळून आले.