इंग्लंडचा फ्रान्सवर ६-४ ने विजय; एमबाप्पेचा जागतिक फुटबॉलमध्ये नवा इतिहास!
FIFA World Cup 2026 | फुटबॉल विश्वचषकातील (World Cup) तिसऱ्या स्थानासाठी खेळवल्या गेलेल्या अत्यंत अटीतटीच्या आणि ऐतिहासिक सामन्यात इंग्लंडने फ्रान्सचा ६-४ असा पराभव करत कांस्यपदकावर आपले नाव कोरले. या सामन्यात फ्रान्सच्या पराभवापेक्षा स्टार स्ट्रायकर एमबाप्पेने केलेल्या विश्वविक्रमाचीच जगभर चर्चा रंगली आहे. एमबाप्पेने विश्वचषकाच्या इतिहासात सर्वाधिक २२ गोल करण्याचा महान पराक्रम केला, परंतु साकाची हॅटट्रिक आणि बेलिंगहॅमच्या अद्भूत खेळापुढे फ्रान्सची झुंज अपुरी पडली.
उपांत्य फेरीत स्पेनविरुद्ध पराभूत झालेल्या फ्रान्सच्या संघाला सामन्याच्या सुरुवातीला धक्का बसला. इंग्लंडने रणनीती म्हणून हॅरी केन आणि ज्युड बेलिंगहॅमसारख्या दिग्गजांना सुरुवातीला राखीव खेळाडूंच्या बाकावर बसवले होते. तरीही इंग्लंडच्या संघाने फ्रान्सची बचावात्मक फळी सहज भेदत सामन्यात ४-० अशी भक्कम आघाडी घेतली आणि फ्रेंच संघाला पूर्णपणे बॅकफूटवर ढकलले.
४-० ने पिछाडीवर पडल्यानंतर फ्रान्सचा कर्णधार एमबाप्पेने संघाची धुरा आपल्या खांद्यावर घेतली. ४८ व्या मिनिटाला त्याने इंग्लंडचा गोलरक्षक डीन हेंडरसनला चकवत पहिला गोल केला. त्यानंतर ६६ व्या मिनिटाला २७ वर्षीय एमबाप्पेने फुटबॉल जगतात इतिहास रचला. डी-बॉक्सच्या आत १४ यार्डांवरून डाव्या पायाने गोल करत त्याने मेस्सीचा २१ गोलांचा विश्वविक्रम मोडीत काढला.
हेही वाचा
“संसदेवरील मोर्चा म्हणजे भारताची दुसरी स्वातंत्र्य चळवळ!” सोनम वांगचुक यांचा रुग्णालयातून संदेश
एमबाप्पेचा नवा विश्वविक्रम:
या गोलसह एमबाप्पेने विश्वचषक इतिहासात वैयक्तिक २२ गोल पूर्ण करत लिओनेल मेस्सीला मागे टाकले. तसेच या स्पर्धेतील १० गोलांसह त्याने मेस्सीपेक्षा २ गोल जास्त करत गोल्डन बूटच्या (Golden Boot) शर्यतीत आघाडी घेतली.
साकाची हॅटट्रिक अन् बेलिंगहॅमचा ‘फिनिशिंग टच’
एमबाप्पेच्या या दुसऱ्या गोलमुळे सामना ४-३ अशा स्थितीत आला होता. मात्र, इंग्लंडच्या बुकायो साकाने एकामागून एक गोल डागत आपली शानदार हॅटट्रिक पूर्ण केली आणि सामना ५-३ वर नेला. फ्रान्सकडून डेम्बेलेने गोल करत सामना पुन्हा ५-४ अशा रोमांचक वळणावर आणला.
सामना संपायला काही मिनिटे शिल्लक असताना फ्रान्स बरोबरी साधण्याच्या प्रयत्नात होते, परंतु अतिरिक्त वेळेत (Injury Time) राखीव खेळाडू म्हणून मैदानात उतरलेल्या ज्युड बेलिंगहॅमने जादू केली. रिअल माद्रिदच्या या मिडफिल्डरने फ्रान्सच्या अनेक बचावपटूंना हुलकावणी देत एक अप्रतिम ‘सोलो रन’ केला आणि गोल करत इंग्लंडच्या ६-४ अशा अविश्वसनीय विजयावर शिक्कामोर्तब केले.
महाईन्यूज-X वर फॉलो करा : महाईन्यूजला instagram वर फॉलो करा
