सिडनी | क्रिकेटपटूंचे मैदानावरील खेळीकडे जसे चाहत्यांचे लक्ष असते तसेच, खेळाडूंचे अफेअर, प्रेम आणि घटस्फोट हे सगळ्यात चाहत्यांना रस असतो.
अशाच एका दिग्गज क्रिकेटपटूच्या घटस्फोटानंतर चाहत्यांना धक्का बसला आहे. लग्नाच्या सात वर्षानंतर ऑस्ट्रेलियाच्या दिग्गज क्रिकेटपटूने घटस्फोट घेण्याचा निर्णय घेतला आहे. ऑस्ट्रेलियाला 2015मध्ये वर्ल्ड कप चॅम्पियन करणारा कर्णधार मायकल क्लार्कचे वैयक्तिक आयुष्य सध्या चर्चेत आहे. ऑस्ट्रेलियान मीडियाने दिलेल्या बातम्यांनुसार मायकल क्लार्कने पत्नी कायलीशी घटस्फोट घेतला आहे. क्लार्कने सोशल मीडियावर या वृत्ताला दुजारा दिला.
सात वर्षांपूर्वी क्लार्कचा विवाह झाला होता. कायली आणि क्लार्क यांना एक मुलगीही आहे. गेल्या काही महिन्यांपासून दोघांमधील संबंध बिघडले होते. एवढेच नाही तर 5 महिन्यांपासून दोघे वेगळेही राहत होते. मायकल क्लार्कने घटस्फोटाबाबत, “गेल्या काही महिन्यांपासून आमच्यात वाद होते. त्यामुळं दोघांनी मिळून विभक्त होण्याचा निर्णय घेतला आहे. आम्ही एकमेकांच्या आनंदाचा विचार करून हा निर्णय घेतला आहे”, असे सांगितले. दरम्यान ऑस्ट्रेलियान मीडियामध्ये सध्या क्लार्कला घटस्फोटानंतर पोडगी म्हणून पत्नीला 192 कोटी द्यावे लागणार आहेत, अशी चर्चा आहे.
