धोनीच्या निवृत्तीबद्दल चर्चा तरी का करायची? जावेद अख्तर धोनीच्या पाठीशी
विश्वचषक स्पर्धेत भारतीय संघाचं आव्हान संपुष्टात आल्यानंतर, पराभवाची जबाबदारी कोणी घ्यायची यावरुन सध्या चर्चांना उधाण आलं आहे. भारतीय संघाचा यष्टीरक्षक महेंद्रसिंह धोनी विश्वचषकानंतरही खेळणार की निवृत्ती स्विकारणार याबद्दलही चाहत्यांमध्ये उत्सुकता आहे. विश्वचषक स्पर्धेत आपल्या संथ खेळीमुळे धोनीला टीकेचं धनी व्हायला लागलं होतं. मात्र भारतीय चित्रपटसृष्टीचे ज्येष्ठ गीतकार जावेद अख्तर यांनी धोनीला आपला पाठींबा जाहीर केला आहे.
अख्तर यांनी आपल्या ट्विटर हँडलवरुन, धोनीची पाठराखण करत धोनी भारतीय संघातला सर्वात विश्वासू खेळाडू असल्याचं म्हटलं आहे. कर्णधार विराटनेही धोनीचं संघातलं महत्व मान्य केलं असल्याचं, जावेद अख्तर म्हणाले आहेत.
दरम्यान, विश्वचषक स्पर्धेनंतर धोनी निवृत्ती स्विकारणार की नाही याबद्दल अद्याप कोणतीही अधिकृत माहिती समोर आलेली नाहीये. खुद्द कर्णधार विराट कोहलीने न्यूझीलंडविरुद्ध सामन्यानंतर पत्रकार परिषदेत याबद्दलची माहिती दिली होती.