मुख्यमंत्री सहायता निधीला पश्चिम महाराष्ट्र देवस्थान समितीने दोन कोटी रुपयांची मदत जाहीर
करोनाचे संकट कोल्हापूरमध्ये येऊन ठेपले आहे. या पार्श्वभूमीवर करोनाबाधित आणि संशयितांवर उपचारासाठी आरोग्ययंत्रणेला आर्थिक बळ मिळावे, यासाठी पश्चिम महाराष्ट्र देवस्थान समितीने दोन कोटी रुपयांची मदत जाहीर केली आहे. पश्चिम महाराष्ट्र देवस्थान समितीचे अध्यक्ष महेश जाधव यांनी ही माहिती दिली.
यामध्ये मुख्यमंत्री सहायता निधीसाठी दीड कोटी तर कोल्हापूर जिल्ह्यासाठी ५० लाख रुपये देण्यात येणार आहेत. कोल्हापूर जिल्ह्यासाठीची मदत जिल्हाधिकारी दौलत देसाई यांच्याकडे सुपूर्द करण्यात येणार आहे.
करोना विषाणूंचा प्रादुर्भाव रोखण्यासाठी सीपीआर हॉस्पिटल येथे संपूर्ण वैद्यकीय यंत्रणा, डॉक्टर्स आणि कर्मचारी रात्रंदिवस कार्यरत आहेत. भविष्यात करोनाचा संसर्ग वाढू नये, यासाठी वैद्यकीय यंत्रणेला आर्थिक मदतीची गरज लागणार आहे. त्यासाठी अंबाबाई मंदिर देवस्थान समितीच्या वतीने हा निधी देण्याचे निर्णय घेण्यात आला आहे. गेले काही दिवसांपासून धार्मिक स्थळे, मंदिरे येथे देणगी स्वरूपात आलेली रक्कम समाजासाठी मदत स्वरूपात द्यावी, असा विचार व्यक्त केला जात होता. सामाजिक भान आणि सध्याच्या परिस्थितीचे गांभीर्य ओळखून अंबाबाई मंदिर पश्चिम महाराष्ट्र देवस्थान समितीने हे विधायक पाऊल उचलले आहे.
दरम्यान मुख्यमंत्री सहायता निधीसाठी दीड कोटी रुपये देण्याची प्रक्रिया देवस्थान समितीने सुरू केली आहे. तसेच जिल्ह्यासाठी ५० लाखांचा निधी सुपूर्द करण्यासाठी जाधव यांनी जिल्हाधिकारी देसाई यांच्याशी संपर्क साधला आहे. ५० लाखापैकी ग्रामीण आरोग्य व नागरी आरोग्य व्यवस्थेसाठी आणि सीपीआरमधील सुविधांसाठी प्रत्येकी २५ लाख खर्च करावेत, अशी अपेक्षा देवस्थानने व्यक्त केली आहे.
