पुणे|महाईन्यूज|प्रतिनिधी|
देशातील पोलिस महासंचालकांच्या पुण्यात होणाऱ्या परिषदेला पंतप्रधान नरेंद्र मोदी दोन दिवस येण्याचे निश्चित झाले आहे. त्यांच्या दौऱ्याच्या पार्श्वभूमीवर पंतप्रधानांचे सुरक्षा प्रमुख वाय. के. जेठवा यांनी गुरुवारी सुरक्षेचा आढावा घेतला. सात व आठ डिसेंबर हे दोन दिवस पंतप्रधान पुण्यात मुक्कामी असण्याची शक्यता आहे. तसेच, केंद्रीय गृहमंत्री अमित शहादेखील या परिषदेला उपस्थित राहणार आहेत.
पुण्याच्या बाणेर परिसरातील आयसर (भारतीय विज्ञान शिक्षण आणि संशोधन संस्था) या संशोधन संस्थेत सहा ते आठ डिसेंबर दरम्यान ही डीजी परिषद होणार आहे. या परिषदेला मोदी आणि शहा उपस्थित राहणार आहेत. त्यामुळे अगोदर गुप्तचर विभागाचे प्रमुख अरविंद कुमार यांनीदेखील परिषद होणाऱ्या ठिकाणाची पाहणी करून सुरक्षा यंत्रणांना आवश्यक त्या सूचना दिल्या होत्या. त्या वेळी त्यांच्यासोबत पोलिस महासंचालक सुबोध जयस्वाल, पुणे पोलिस आयुक्त उपस्थित होते. परिषद शुक्रवारपासून सुरू होणार आहे. तीन दिवसांच्या या परिषदेत देशातील अंतर्गत सुरक्षा व्यवस्थेचा आढावा यासह अन्य विषयांवर चर्चा होणार आहे. या परिषदेत राष्ट्रीय सुरक्षा सल्लागार अजित डोवाल, उपसल्लागार दत्ता पडसलगीकर यांच्यासह १८० पेक्षा अधिक वरिष्ठ अधिकारी सहभागी होतील. त्यांना पंतप्रधान नरेंद्र मोदी, केंद्रीय गृहमंत्री अमित शहा परिषदेत मार्गदर्शन करतील.
