नरेंद्र दाभोलकर हत्या प्रकरण, आरोपी विक्रम भावेंचा जामीन अर्ज कोर्टाने फेटाळला
पुणे |महाईन्यूज|
अंधश्रद्धा निर्मूलन समितीचे कार्याध्यक्ष डॉ. नरेंद्र दाभोलकर यांच्या हत्या प्रकरणातील आरोपी विक्रम भावे याचा जामीन अर्ज मंगळवारी कोर्टाने फेटाळला. विशेष न्यायाधीश एस. आर. नावंदर यांच्या कोर्टाने हा आदेश दिला.
या प्रकरणात अॅड. संजीव पुनाळेकर आणि विक्रम भावे यांना अटक करण्यात आली होती. त्यांच्यावर डॉ. दाभोलकर हत्या प्रकरणातील आरोपींना पुरावा नष्ट करण्याचे मार्गदर्शन करण्यात आल्याचे आरोप आहेत. अॅड. पुनाळेकर यांना काही अटीशर्तीवर जामीन मिळाल्यानंतर भावे यानेदेखील जामिनासाठी अर्ज केला होता. मात्र, या प्रकरणातील एका आरोपीने दिलेल्या जबाबात भावेचे नाव आहे. आतापर्यंत झालेल्या तपासातून भावेचा या गुन्ह्यात प्रथमदर्शनी सहभाग दिसून येतो. भावेला यापूर्वी एका गुन्ह्यात शिक्षा झाली असून, तो सध्या जामिनावर आहे. असे असताना त्याचे या गुन्ह्यात नाव आल्याने न्यायालयाने त्याचा जामीन अर्ज फेटाळला. या प्रकरणाची पुढील सुनावणी ३० जानेवारी रोजी होणार आहे.
