कोल्हापूर – उमेदवारांनी सोशल मीडियाचा वापर करताना नामनिर्देशनपत्रामध्ये तसेच प्रतिज्ञापत्रामध्ये दिलेल्या अधिकृत खात्यावरुनच प्रचार करावा, असे आवाहन जिल्हाधिकारी दौलत देसाई यांनी केले आहे. मल्टिपल खात्यांवरुन प्रचार झाल्यास त्याबाबत कारवाई केली जाईल. उमेदवाराच्या संमतीशिवाय सोशल मीडियावरुन अन्य कोणी प्रचार केल्यास त्यांच्यावरही कारवाई केली जाईल, असा इशारा जिल्हाधिकाऱ्यांनी दिला.
विधानसभा निवडणुकीसाठी जिल्हास्तरीय माध्यम कक्षास जिल्हाधिकारी दौलत देसाई यांनी भेट देऊन कामकाजाची पाहणी केली. यावेळी जिल्हाधिकारी देसाई म्हणाले, ‘सोशल मीडियाचा वापर करताना उमेदवार तसेच त्यांच्या प्रतिनिधींनी अन्य दुसऱ्या उमेदवाराबाबत चुकीची पोस्ट करणे किंवा एका उमदेवाराने मल्टिपल खात्यावरुन पोस्ट होणार नाही, याची दक्षता घ्यावी. प्रतिज्ञापत्रात दिलेल्या खात्यावरुनच सोशल मीडियाचा प्रचार होत आहे याची खात्री करावी. उमदेवाराच्या नावाने इतर कोणी खाते सुरू करुन उमदेवाराच्या संमतीशिवाय वापर करीत असेल तर अशांवरही कारवाई केली जाईल. विधानसभा निवडणूक प्लास्टिक विरहीत करण्यावर निवडणूक आयोगाने भर दिला असून सर्व राजकीय पक्ष आणि उमेदवारांनी निवडणूक कामकाज प्लास्टिक विरहीत करावे. प्लास्टिकचा वापर होणार नाही याची दक्षता घेवून प्रशासनास सहकार्य करावे, असे आवाहनही जिल्हाधिकाऱ्यांनी केले.
