पिंपरी-चिंचवड महापालिकेची निवडणूक स्वबळावर लढणार का? प्रदेशाध्यक्ष रवींद्र चव्हाण म्हणाले..
पिंपरी | पिंपरी-चिंचवड महापालिकेच्या आगामी निवडणुकीत भाजप स्वबळावर लढणार की महायुतीसोबत, याबाबतचा निर्णय शहरातील कोअर कमिटी स्थानिक परिस्थितीचा अभ्यास करून घेईल. त्यानंतर हा प्रस्ताव वरिष्ठ पातळीवर पाठवला जाईल आणि अंतिम निर्णय तिथे होईल, असे भाजपचे प्रदेशाध्यक्ष रवींद्र चव्हाण यांनी स्पष्ट केले. चिंचवड येथील प्रा. रामकृष्ण मोरे प्रेक्षागृहात शनिवारी पिंपरी-चिंचवड शहर भाजपचा कार्यकर्ता मेळावा पार पडला. यावेळी चव्हाण यांनी पक्षाच्या निवडणूक धोरणाबाबत महत्त्वाचे संकेत दिले.
मेळाव्याला प्रदेश सरचिटणीस राजेश पांडे, आमदार महेश लांडगे, शंकर जगताप, उमा खापरे, अमित गोरखे, माजी आमदार अश्विनी जगताप आणि शहराध्यक्ष शत्रुघ्न काटे उपस्थित होते. मेळाव्यात राष्ट्रवादी काँग्रेसचे माजी नगरसेवक अरुण टाक यांनी भाजपमध्ये प्रवेश करून पक्षाला बळ दिले. कार्यकर्त्यांच्या उपस्थितीत त्यांचे स्वागत करण्यात आले.
हेही वाचा : कचऱ्यात सापडलेली १० लाखांची पिशवी; अंजू माने यांनी प्रामाणिकपणाने केली परत
प्रदेशाध्यक्ष रवींद्र चव्हाण म्हणाले, भाजपचा कार्यकर्ता वैचारिक पकड घेऊन पक्षाचा राष्ट्रीयत्वचा अजेंडा घेऊन चालत आहे. जगभरातील सर्वांत मोठी पार्टी भाजप आहे. जगभरात गेल्यानंतर पंतप्रधान नरेंद्र मोदी यांच्या भारत देशातून आलात का असे विचारले जाते. दोन खासदारांपासून सुरू झालेला हा प्रवास वैचारिक पकडेमुळे जगभरात गेला आहे. इतर पक्षाकडे कोणताचा अजेंडा नाही. राष्ट्रहिताचा अजेंडा घेऊन केवळ भाजप पक्ष चालतो. प्रत्येकाच्या मनात भाजप आहे. विचारधारेला मानणारे नगरसेवक महापालिकेत पाठवायचे आहेत. भाजप वेगळा पक्ष आहे. प्रादेशिक पक्षाकडे पारिवारिक अजेंडा असू शकतो. भाजपचा अजेंडा देश, राष्ट्रहिताचा आहे. बूथवरील ५१ टक्के मतांची लढाई लढायची आहे. त्यासाठी डोक्यावर बर्फ, तोंडात साखर आणि पायला भिंगरी लावून फिरणारा कार्यकर्ता पाहिजे. भारत माता की जय, वंदे मातरम हा मंत्र प्रत्येकाच्या मनात पोहोचवायचा आहे.
