भारताची ताकद समजावून सांगण्यासाठी मोदींसमोरच राजनाथ यांनी सांगितली बजरंग बलीची कहाणी…
नवी दिल्ली : संरक्षण मंत्री राजनाथ सिंह यांनी आज भारताची ताकद स्पष्ट करण्यासाठी बजरंग बालीचा उल्लेख केला. राष्ट्रीय तंत्रज्ञान दिनाच्या कार्यक्रमात राजनाथ म्हणाले की, पंतप्रधान नरेंद्र मोदी यांच्या नेतृत्वाखाली आणि मार्गदर्शनाखाली आपला देश दिवसरात्र चौपट प्रगती करत आहे. २१ वे शतक हे भारताचे शतक आहे, असे जागतिक स्तरावर आपण लोकांना म्हणताना ऐकले आहे. सध्या जगाला भारतात आशेचा नवा किरण दिसत असून पंतप्रधानांच्या नेतृत्वाखाली भारताच्या रूपातील सूर्य उगवला आहे आणि आपला सूर्य आता पूर्ण तेजाने तळपायला सज्ज झाला आहे हेही आपण जगाला दाखवून दिले आहे. . यानंतर राजनाथ म्हणाले, ‘मी येथे सूर्याचा उल्लेख करत आहे कारण आपण आपल्या पौराणिक कथांमध्ये डोकावले तर आपल्याला असे दिसून येईल की सूर्याशी आपले अप्रतिम नाते आहे. आपण सर्वजण बजरंगबलीचे उपासक आहोत. बजरंगबलीने सूर्याला फळ समजून गिळल्याची घटना तुम्ही सर्वांनी ऐकली असेल. नंतर देवांची समजूत घालून त्यांनी सूर्याला मुक्त केले. यातून बजरंग बली यांनी आपली अफाट शक्ती तर दाखवलीच, शिवाय आपली ताकद वाढवली तर सूर्यसुद्धा आपल्या हातात येऊ शकतो, असा संदेशही दिला.
केंद्रीय मंत्री म्हणाले की, 1998 मध्ये देशाच्या अणुचाचणीने जगाला संदेश दिला की भारत हा शांतताप्रिय देश असला तरी स्वाभिमानाच्या विरोधात उचललेले कोणतेही पाऊल ते खपवून घेणार नाही. ते म्हणाले की, नालंदा येथील शिक्षण केंद्र आणि सोमनाथ येथील सांस्कृतिक प्रतीक बाह्य आक्रमकांनी नष्ट केल्यानंतर भारताने इतिहासातून धडा घेतला आहे.
1998 मध्ये पोखरण-2 अणुचाचणीच्या 25 व्या वर्धापन दिनानिमित्त आयोजित कार्यक्रमात राजनाथ म्हणाले, “आम्ही इतिहासातून धडा घेतला आहे आणि आम्ही असा संकल्प केला आहे की आम्ही अशा इतिहासाची पुनरावृत्ती होऊ देणार नाही.
संरक्षण मंत्री म्हणाले, ‘भारताच्या अणुचाचण्यांनी जगाला संदेश दिला आहे की आपण शांतताप्रिय राष्ट्र असलो तरी नालंदा पुन्हा जळताना दिसणार नाही. सोमनाथसारखे आमचे सांस्कृतिक प्रतीक पुन्हा नष्ट होणे आम्ही सहन करणार नाही. आमच्या स्वाभिमानाच्या विरोधात उचललेल्या प्रत्येक पावलाला आम्ही चोख प्रत्युत्तर देऊ, असे सिंग म्हणाले. पंतप्रधान नरेंद्र मोदी, विज्ञान आणि तंत्रज्ञान मंत्री जितेंद्र सिंग आणि उच्च शास्त्रज्ञही यावेळी उपस्थित होते.
