‘निवडणुकांत दुबार मतदार दिसला की बडवून काढा’; राज ठाकरे आक्रमक
Raj Thackray | मुंबईत आज महाविकास आघाडीप्रणीत विरोधी पक्षांच्या ‘सत्याचा मोर्चा’ला जबरदस्त प्रतिसाद मिळाला. फॅशन स्ट्रीट ते मुंबई महानगर पालिका भवनादरम्यान काढण्यात आलेल्या या मोर्चात हजारो कार्यकर्ते, नागरिक आणि सर्व पक्षांचे नेते मोठ्या संख्येने सहभागी झाले. पालिका भवनासमोर झालेल्या जाहीर सभेत मनसे अध्यक्ष राज ठाकरे यांनी निवडणूक आयोगावर थेट निशाणा साधत मतदारयाद्यांमधील घोटाळ्याचा मुद्दा उचलला.
राज ठाकरे म्हणाले, आम्ही बोलतोय, उद्धव ठाकरे बोलतायत, शरद पवार बोलतायत की याद्यांमध्ये दुबार मतदार आहेत. शेतकरी कामगार पक्षही बोलतोय, कम्युनिस्ट पक्षाचे लोक बोलतायत, काँग्रेसचे लोक बोलतायत. एवढंच नाही, भाजपाचेही लोक बोलतायत की दुबार मतदार आहेत. शिंदेंचे, अजित पवारांचेही लोक बोलतायत. अरे मग अडवलं कुणी? मग हे निवडणूक घेण्याची घाई का करत आहेत? साधी गोष्ट आहे. मतदारयाद्या साफ करा. त्यानंतर जेव्हा निवडणुका होती, त्यात यश-अपयश सगळ्या गोष्टी मान्य असतील. सगळं लपवून-छपवून चाललंय, ते कशासाठी? असा सवाल त्यांनी उपस्थित केला.
कल्याण ग्रामीण, डोंबिवली, मुरबाड, भिवंडीतले ४५०० मतदार आहेत. या मतदारांनी तिथेही मतदान केलं आणि मुंबईच्या मलबार हिल मतदारसंघातही मतदान केलं आहे. महाराष्ट्रभर असे लाखो लोक आहेत जे या मतदानासाठी वापरले गेले, असा दावा करत राज ठाकरेंनी किती दुबार मतदार आहेत, याची एक यादीच वाचून दाखवली.
हेही वाचा : आंध्र प्रदेशातील वेंकटेश्वर मंदिरात चेंगराचेंगरी; ९ भाविकांचा मृत्यू
हे लोक म्हणतात पुरावे कुठे आहेत. १ जुलैपर्यंतच्या यादीनुसार मुंबई नॉर्थ मतदारसंघात १७ लाख २९ हजार ४५६ मतदार आहेत. त्यापैकी ६२ हजार ३७० दुबार आहेत. मुंबई नॉर्थ-वेस्ट मध्ये १६ लाख ७४ हजार ८६१ मतदार आहेत. त्यात ६० हजार २३१ दुबार मतदार आहेत. मुंबई नॉर्थ इस्टमध्ये १५ लाख ९० हजार ७१० मतदार आहेत. त्यायत ९२ हजार ९८३ दुबार मतदार आहेत. मुंबई नॉर्थ सेंट्रलमध्ये १६ लाख ८१ हजार ०४८ मतदार आहेत. त्यात ६३ हजार ७४० दुबार आहेत. मुंबई साऊथ सेंट्रलमध्ये १४ लाख ३७ हजार ७७६ मतदार असून त्यात ५०५६५ दुबार मतदार आहेत. मुंबई साऊथमध्ये १५ लाख १५ हजार ९९३ पैकी ५५ हजार २०५ दुबार मतदार आहेत. नाशिक लोकसभेत १९ लाख ३४ हजार ३४९ पैकी ९९ हजार ६७३ दुबार मतदार आहेत. मावळ लोकसभेत १९ लाख ८५ हजार १७२ पैकी १ लाख ४५ हजार ६३६ दुबार मतदार आहेत. पुणे लोकसभेत १७ लाख १२ हजार २४२ पैकी १ लाख २ हजार ०२ दुबार मतदार आहेत. ठाणे लोकसभेत २ लाख ९ हजार ९८१ दुबार मतदार आहेत, असं राज ठाकरे म्हणाले.
जेव्हा कधी निवडणुका होतील, तेव्हा याद्यांवर तुम्ही सगळे काम करा. चेहरे कळले पाहिजेत. जर त्यानंतर हे दुबार-तिबारवाले आले, तर तिथेच फोडून काढायचे. बडव बडव बडवायचे आणि मग पोलिसांच्या हातात द्यायचे. त्याशिवाय हे वठणीवर येणार नाहीत, असं राज ठाकरे म्हणाले.
