‘नफरत का जवाब नफरत से मिलेगा’; अबू आझमी यांचा राज ठाकरे यांना टोला

देशातील एकंदरीत परिस्थिती भयानक आहे. भाजपाचे नेते हिंदू-मुस्लीम विषयावर बोलतात, परंतु विकासावर बोलत नाहीत. त्यांनी मंदिर-मशीद वादामुळे संविधान धोक्यात आणले आहे. बाबरी मशिदीवरील सर्वोच्च न्यायालयाचा निर्णय देशातील मुसलमानांनी स्वीकारला, त्याचा आदर केला. पण आता ज्ञानवापी मशिदीचा नवीन वाद पुढे आणला जात आहे, असेही आझमी पुढे म्हणाले.

भारतीय जनता पार्टीबाबत काँग्रेसचे सरचिटणीस खासदार राहुल गांधी यांनी केलेले वक्तव्य बरोबर आहे. आगामी काळात भारतात नरसंहार होण्याची भीती आहे. यामध्ये सर्वांचेच नुकसान होईल. दलितांचे आरक्षण आणि मुस्लिमांचा अल्पसंख्यक हा दर्जा संपवण्याचा यांचा कुटील डाव आहे, असा आरोप त्यांनी केला. आरक्षणाचा उपयोग वंचितांना होत आहे. परंतु देशात रेल्वे सारखे मोठे सार्वजनिक उद्योग विकले जात आहेत. नोकऱ्या कमी होत आहेत, असेही ते पुढे म्हणाले. महागाई, बेरोजगारी, भ्रष्टाचार, आरोग्य, पाणी या समस्यांवरील नागरिकांचा रोष व्यक्त होऊ नये, म्हणून, विनाकारण पुन्हा पुन्हा हिंदू-मुस्लिम आणि मंदिर-मशीद तसेच हिंदुत्वाचा मुद्दा पुढे आणला जात असून श्रीलंकेसारखी भारताची परिस्थिती होऊ नये, यासाठी सर्व नागरिकांनी तसेच सर्व पक्षांनी संविधानाचा आदर आणि पालन केले पाहिजे असेही आवाहन अबू आझमी यांनी केले आहे.