वाहन तोडफोडीचे सत्र सुरुच ; पिंपळे-गुरव परिसरात १५ ते २० वाहनांची तोडफोड
पिंपरी : शहरात गेल्‍या काही दिवसांपासून वाहन तोडफोडीचे सत्र सुरु आहे. आता पिंपळे-गुरव परिसरात दोघांनी १५ ते २० वाहनांची तोडफोड केली आहे. ही घटना रविवारी (दि. 15) पहाटे चार वाजताच्या सुमारास मयूर नगरी येथे घडली.
सांगवी पोलीस ठाण्याच्या हद्दीत पिंपळे गुरव परिसरातील मयूर नगरी येथे रस्त्याच्या बाजूला पार्क केलेल्या वाहनांची दोन अनोळखी तरुणांनी तोडफोड केली.पहाटे चार वाजताच्या सुमारास दोघेजण तोंडाला रुमाल बांधून आले. त्यांनी दिसेल त्या वाहनावर कोयत्याने मारून वाहनांचे नुकसान केले.
हेही वाचा – ‘इस्त्रो’मधील शास्त्रज्ञ तेजस्वी शिंदे ही पिंपरी-चिंचवडकरांचा अभिमान!
वाहनांच्या काचा फोडण्यात आल्या आहेत. घटनेची माहिती मिळतात सांगवी पोलिसांनी घटनास्थळी धाव घेतली.तोडफोडीचा संपूर्ण प्रकार परिसरातील सीसीटीव्ही कॅमेऱ्यामध्ये कैद झाला आहे. पोलिसांनी सीसीटीव्ही फुटेज हस्तगत केले आहे. तोडफोड करणाऱ्या दोघांचा शोध सांगवी पोलीस घेत आहेत.
गेल्‍या काही दिवसांपासून शहरातील समाजकंटक वाहनांची तोडफोड करत असल्‍याचे दिसून येत आहे. शहराच्‍या वेगवेगळ्या भागांमध्ये हे तोड-फोडीचे प्रकार सुरुच आहेत.
तोडफोड प्रकरणांमध्ये वाहनांच्या काचा फुटल्याने त्याबाबत विमा संरक्षण देखील वाहन मालकांना मिळत नाही. त्यामुळे वाहन मालकांना आर्थिक नुकसान सहन करावे लागते. अशा समाजकंटकांवर कडक कारवाई करण्याची मागणी नागरिकांकडून होत आहे.
