‘ बॅटल ऑफ द एलिट्स’मधून विद्यार्थ्यांच्या सृजनशीलतेचे प्रदर्शन!
शिक्षण विश्व: एमआयटी एसीएससीमध्ये बॅटल ऑफ द एलिट्स २०२५ स्पर्धा संपन्न
पिंपरी चिंचवड: आळंदी येथील एमआयटी आर्ट्स, कॉमर्स अँड सायन्स कॉलेजमध्ये आयोजित करण्यात आलेल्या बॅटल ऑफ द एलियट स्पर्धेमधून विद्यार्थ्यांच्या कल्पकता बुद्धिमत्ता आणि नवकल्पनांचे उत्तम प्रदर्शन दिसून आले.
एमआयटी आर्ट्स, कॉमर्स अँड सायन्स कॉलेज, आळंदी (डी), पुणे येथील राईफ आणि रॉ क्लबने आयोजित केलेला “बॅटल ऑफ द एलिट्स २०२५: सर्व्हायव्हल ऑफ द शार्पेस्ट” हा कार्यक्रम नुकताच महाविद्यालयाच्या परिसरात मोठ्या उत्साहात पार पडला.
विद्यार्थ्यांमधील बुद्धिमत्ता, कल्पकता, समस्या सोडवण्याच्या क्षमतेसह सांघिक कार्याची क्षमता समोर आणण्यासाठी तसेच निरोगी स्पर्धेला प्रोत्साहन देण्यासाठी या कार्यक्रमाचे आयोजन करण्यात आले होते. या स्पर्धेत महाविद्यालयाच्या विविध विभागांचे प्रतिनिधित्व करणाऱ्या एकूण सहा चमूंनी सहभाग घेतला होता. प्रत्येक संघाने आपापल्या अद्वितीय कौशल्यांच्या जोरावर उत्कृष्ट सादरीकरण केले आणि स्पर्धेचे वातावरण चुरसपूर्ण आणि प्रेरणादायी बनवले.
ही स्पर्धा चार टप्प्यांमध्ये विभागलेली होती. प्रत्येक टप्पा ही एक आव्हानात्मक फेरी होती, ज्यामध्ये विद्यार्थ्यांची बौद्धिक साक्षरता, नवोन्मेष, रणनीती आखण्याची कला आणि दबावाखाली निर्णय घेण्याची क्षमता तपासण्यात आली. एलिमिनेशन फॉरमॅटमध्ये रचलेली ही स्पर्धा प्रत्येक फेरीसह अधिकच उत्कंठावर्धक होत गेली. शेवटी, डिझाईन ॲनालिटिक्स आणि सायबर सिक्युरिटी विभागाच्या चमूने बाजी मारत विजेतेपद मिळवले, तर बिझनेस ॲडमिनिस्ट्रेशन आणि इंटरनॅशनल बिझनेस विभागाच्या चमूने उपविजेतेपदावर आपली मोहोर उमटवली.
हेही वाचा – चुकीचे कुणबी प्रमाणपत्र दिल्यास कारवाई करणार’; मंत्री चंद्रशेखर बावनकुळेंनी दिला इशारा
कार्यक्रमाच्या ठळक बाबींमध्ये सहा चमूंचा सहभाग, चातुर्याने डिझाइन केलेल्या चार सर्जनशील फेऱ्या, तसेच राईफ आणि रॉ क्लबच्या प्राध्यापक सदस्यांचा सक्रिय सहभाग आणि मार्गदर्शन यांचा समावेश होता.
कार्यक्रमानंतर आयोजकांच्या वतीने बोलताना समन्वयक, राईफ आणि रॉ क्लब डॉ. हनुमंत शिंगाडे, विद्यार्थी असोसिएट डीन डॉ. सुनील महाजन, संचालक डॉ. बी.बी. वाफारे यांनी विद्यार्थ्यांच्या स्फूर्तिदायक सहभागाचे भरभरून कौतुक केले. त्यांनी अशा प्रकारच्या स्पर्धा विद्यार्थ्यांमध्ये नेतृत्वगुण, आत्मविश्वास आणि नवकल्पनांचे बीज रोवण्यासाठी अत्यंत उपयुक्त असल्याचे स्पष्ट केले.
या कार्यक्रमाने विद्यार्थ्यांमध्ये केवळ चुरस निर्माण केली नाही, तर सहकार्य, सर्जनशीलता, विचारांची देवाणघेवाण आणि निरोगी स्पर्धेचा आदर्श देखील निर्माण केला. सहभागींप्रमाणेच प्रेक्षकांसाठीही हा एक संस्मरणीय आणि प्रेरणादायी अनुभव ठरला.
