मास्टर माइंड ग्लोबल स्कूलमध्ये ७७ वा प्रजासत्ताक दिन उत्साहात संपन्न
शिस्त आणि कर्तव्यनिष्ठा हेच यशाचे गमक; निवृत्त उपअधीक्षक तानाजी घरबुडवे यांचे प्रतिपादन
पिंपरी चिंचवड : येथील मास्टर माइंड ग्लोबल स्कूल अँड ज्युनिअर कॉलेजमध्ये ७७ वा प्रजासत्ताक दिन मोठ्या उत्साहात आणि देशभक्तीच्या वातावरणात साजरा करण्यात आला. या सोहळ्याला प्रमुख पाहुणे म्हणून निवृत्त उपअधीक्षक (कारागृह) श्री. तानाजी घरबुडवे उपस्थित होते.
कार्यक्रमाची सुरुवात प्रमुख पाहुणे, शाळेच्या प्राचार्या डॉ. प्रदीपा नायर, विश्वस्त मणिकंदन नायर आणि पालक प्रतिनिधी यांच्या हस्ते ध्वजारोहणाने झाली. यावेळी विद्यार्थ्यांनी सादर केलेल्या शिस्तबद्ध संचलनाने (परेड) उपस्थितांची मने जिंकली.
अनुभवातून दिला शिस्तीचा मंत्र
प्रमुख पाहुणे श्री. तानाजी घरबुडवे यांनी आपल्या प्रदीर्घ प्रशासकीय अनुभवातून विद्यार्थ्यांना मार्गदर्शन केले. १९८४ पासून ते २०२१ पर्यंतच्या आपल्या सेवेचा प्रवास उलगडताना त्यांनी “शिस्त आणि कर्तव्यनिष्ठा” हेच जीवनातील यशाचे खरे गमक* असल्याचे सांगितले. प्राचार्या डॉ. प्रदीपा नायर यांनी संविधानाचे महत्त्व विशद करून विद्यार्थ्यांना देशाचे जबाबदार नागरिक होण्याचे आवाहन केले.
हेही वाचा –गणेशोत्सव, ढोलपथक, मूर्तीकार अन् लेझीम.. महाराष्ट्राच्या चित्ररथाने वेधलं सर्वांचं लक्ष
सांस्कृतिक कार्यक्रमांची रेलचेल
प्रजासत्ताक दिनानिमित्त विद्यार्थ्यांनी विविध सांस्कृतिक कार्यक्रम सादर केले. यामध्ये देशप्रेमपर नृत्य, नाट्य, मूकनाट्य (Mime Act) आणि साहसी पिरॅमिड्सचे सादरीकरण करण्यात आले. या माध्यमातून विद्यार्थ्यांनी राष्ट्रभक्तीची भावना व्यक्त केली.
गुणवंतांचा गौरव
यावेळी विविध क्षेत्रांत उल्लेखनीय कामगिरी करणाऱ्या विद्यार्थी, पालक आणि शिक्षकांचा पाहुण्यांच्या हस्ते बक्षीस देऊन गुणगौरव करण्यात आला. या सोहळ्याला शाळेचे PTA सभासद, शिक्षक आणि पालक मोठ्या संख्येने उपस्थित होते.
कार्यक्रमाची सांगता राष्ट्रप्रेमाने ओतप्रोत अशा ‘वंदे मातरम्’ च्या जयघोषाने करण्यात आली. आभार प्रदर्शन व मिठाई वाटपानंतर सोहळ्याची यशस्वी सांगता झाली.
