चिखली-कुदळवाडी दगडफेक प्रकरणात ३६ जणांना अटक
पिंपरी-चिंचवड पोलिसांचा दणका: सीसीटीव्ही व ड्रोन फुटेजच्या आधारे शोध मोहीम तीव्र
पिंपरी-चिंचवड । चिखली-कुदळवाडी परिसरातील अनधिकृत धार्मिक स्थळांवरील कारवाई दरम्यान पोलिसांवर झालेल्या दगडफेक प्रकरणात पिंपरी-चिंचवड पोलिसांनी कठोर भूमिका घेतली असून आतापर्यंत ३६ जणांना अटक करण्यात आली आहे. उर्वरित आरोपींचा शोध घेण्यासाठी सीसीटीव्ही, ड्रोन फुटेज आणि शासकीय कॅमेऱ्यांमधील चित्रफितींची बारकाईने तपासणी सुरू आहे.
पिंपरी-चिंचवड महापालिकेने चिखली परिसरातील ११ अनधिकृत धार्मिक बांधकामांवर कारवाई केली होती. या कारवाई दरम्यान परिसरात मोठा पोलीस बंदोबस्त तैनात करण्यात आला होता. मात्र, कारवाई सुरू असताना काही समाजकंटकांनी पोलिसांवर दगडफेक करत कायदा व सुव्यवस्थेला आव्हान दिले. या घटनेनंतर पोलिसांनी तातडीने परिस्थिती नियंत्रणात आणत गुन्हा दाखल केला आणि आरोपींच्या अटकेची मोहीम सुरू केली.
घटनेचा तपास अधिक प्रभावीपणे करण्यासाठी आधुनिक तंत्रज्ञानाचा वापर करण्यात येत आहे. घटनास्थळी असलेल्या सीसीटीव्ही कॅमेऱ्यांचे फुटेज, ड्रोनद्वारे चित्रीत दृश्ये तसेच पोलिसांच्या शासकीय कॅमेऱ्यांमधील चित्रणाची तपासणी करून संशयितांची ओळख पटवली जात आहे. पोलिसांच्या विशेष पथकांकडून आरोपींचा शोध युद्धपातळीवर सुरू असून आणखी अटक होण्याची शक्यता व्यक्त केली जात आहे.
याबाबत माहिती देताना अपर पोलीस आयुक्त सारंग आवाड म्हणाले की, उपलब्ध व्हिडिओ फुटेजच्या आधारे प्रत्येक आरोपीची अचूक ओळख पटविण्याचे काम सुरू आहे. पोलिसांवर हल्ला करणाऱ्या कोणत्याही व्यक्तीला कायद्याच्या कक्षेबाहेर राहू दिले जाणार नाही. दोषींवर कठोर कारवाई करण्यात येईल, असा इशाराही त्यांनी दिला. दरम्यान, परिसरात शांतता व सुव्यवस्था कायम राखण्यासाठी अतिरिक्त पोलीस बंदोबस्त तैनात करण्यात आला असून नागरिकांनी अफवांवर विश्वास न ठेवता पोलिसांना सहकार्य करण्याचे आवाहन प्रशासनाकडून करण्यात आले आहे.
