‘मी छोट्या राजनचा माणूस’,’पैसे दिले नाही तर तुझी गेम करू’
उर्से गावच्या पोलिस पाटलासह पाच जणांवर गुन्हा दाखल
पिंपरी |महाईन्यूज|
‘मी छोट्या राजनचा माणूस आहे. आम्हाला पैसे दिले नाही तर तुझी गेम करू,’ अशी धमकी देत पाच जणांनी एका व्यावसायिकाकडे ३० लाख रुपयांची खंडणी मागितली. हा प्रकार १० फेब्रुवारी रोजी दुपारी दोन वाजता उर्से गावाजवळ घडला. या प्रकरणी उर्से गावच्या पोलिस पाटलासह पाच जणांवर गुन्हा दाखल करण्यात आला असून, त्यातील तिघांना अटक करण्यात आली आहे. या प्रकरणी कुलदीप ज्ञानोबा धामणकर (वय २६, रा. उर्से, ता. मावळ) यांनी तळेगाव दाभाडे पोलिस ठाण्यात फिर्याद दिली आहे.
सुलतान महाभूत मुलाणी (४४), गुलाब बबन धामणकर (४१), सतीश लक्ष्मण कारके (२९) असे अटक केलेल्या तिघांची नावे आहेत. तर, पोलिस पाटील गुलाब छबूराव आंबेकर, सुनील बाबूराव आंबेकर (सर्व रा. उर्से ता. मावळ) यांचा शोध पोलिस घेत आहेत.
पोलिसांनी दिलेल्या माहितीनुसार, फिर्यादी कुलदीप हे व्यावसायिक असून, १० फेब्रुवारी रोजी दुपारी उर्से गावाच्या हद्दीत पुणे-मुंबई द्रुतगती मार्गावरील पुलावर ते काम करीत होते. त्या वेळी सर्व आरोपी तिथे आले. त्यांनी ‘तू कसे काय काम करतोस, तुझ्याकडे आम्ही पाहून घेतो. तुला काम करायचे असेल तर आम्हाला पैसे द्यावे लागतील,’ अशी धमकी कुलदीप यांना दिली. त्यावर कुलदीप यांनी ‘मी सर्व कायदेशीर परवानग्या घेतल्या आहेत. मी तुम्हाला पैसे देणार नाही,’ असे सांगितले. त्यानंतर आरोपींनी पुलाच्या शेजारी बाळू बजाबा धामणकर यांच्या टपरीच्या समोरील जमिनीत गाडलेली इलेक्ट्रिक लाइनची केबल ट्रॅक्टरच्या मदतीने उकरून काढली. कुलदीप यांनी आरोपींना समजावून सांगण्याचा प्रयत्न केला. मात्र, आरोपींनी ‘तू आम्हाला पाच लाख रुपये दे आणि गावासाठी २५ लाख रुपये दे,’ असे म्हणून एकूण ३० लाख रुपयांची खंडणी मागितली. आरोपी सतीश कारके याने ‘मी छोटा राजनचा माणूस आहे. आम्हाला पैसे दिले नाही तर आम्ही तुझी गेम करू,’ अशी कुलदीप यांना धमकी दिली. याबाबत गुन्हा दाखल करण्यात आला असून, आरोपींमध्ये पोलिस पाटलाचा देखील समावेश आहे. पोलिसांनी तिघांना अटक केली आहे. या प्रकरणी तळेगाव दाभाडे पोलिस तपास करीत आहेत.
