पिंपरी चिंचवडमध्ये 15 हजार नागरिकांनी बुडविला मिळकतकर
![](https://mahaenews.com/wp-content/uploads/2019/05/pcmc-46_201905234300.jpg)
- एका महिन्यात झाले सर्व्हेक्षण
- मालमत्तेच्या नोंदीकडे नागरिकांचा प्रतिसाद नाहीच
पिंपरी ( महा ई न्यूज ) – पिंपरी चिंचवड महानगरपालिकेचे उत्पन्न वाढवण्याच्या दुष्टीने प्रयत्न सुरु आहेत. त्यानूसार आयुक्त श्रावण हर्डिकर यांनी करसंकलन विभागास नागरिकांच्या मालमत्तेचे एका महिन्यात सर्व्हेक्षण करण्याचे आदेश दिले होते. या सर्व्हेक्षणात 16 करसंकलन कार्यालयातून 14 हजार 928 मिळकतीच्या नोंदी नसल्याचे आढळून आले आहे. त्या नागरिकांना मिळकतकरांची नोटीस बजावून मालमत्तेची नोंद करण्यात येणार आहे.
पिंपरी – चिंचवड महानगरपालिकेच्या करसंकलन विभागाकडून मालमत्ता कराच्या रकमेची व थकबाकीची वसुली करण्यात येते. शहरातील तब्बल 5 लाख 3 हजार निवासी व बिगर निवासी मिळकतींची नोंद झालेली आहे. या मिळकतधारकांपैकी अनेकांकडून कराचा वेळोवेळी भरणा होत नाही.
पिंपरी-चिंचवड शहरातील नागरिक मिळकतकरांची चुकवेगिरी करु लागल्याचे निर्देशनास आले आहे. महापालिकेचे उत्पन्न वाढवण्याऐवजी घट होवू लागली आहे. यामुळेच शहरातील मालमत्तेचे शंभर टक्के सर्व्हेक्षण करण्यात आले आहे. याबाबत पंधरा दिवसात मालमत्तेच्या नोंदणी करावी, असे आवाहन आयुक्तांनी नागरिकांना केले होते. त्याकडे नागरिकांनी दुर्लक्ष केले होते. त्यामुळेच महापालिकेच्या करसंकलन विभागाने 8 जून ते 8 जुलै 2019 पर्यंत एका महिन्यात मालमत्ता करांचे सर्व्हेक्षण करण्याचे आदेश दिले.
पिंपरी-चिंचवड शहरात अनेक नागरिक पालिकेच्या सोयी-सुविधाचा फायदा घेवूनही अनधिकृतपणे बांधकामे केलेली आहेत. हजारो नागरिकांनी बांधकामाची नोंदणी न करणे, वाढीव बांधकाम लपविलेली आहेत. त्या बांधकामांची महापालिकेकडे नोंदणी नसल्याने मिळकतकरांची चुकवेगिरी होवू लागल्याचे निर्दशनास आले होते. यामुळे अधिकृतपणे त्या मालमत्तेची नोंदी करण्यासाठी विशेष पथके तयार करण्यात आले होते.
शहरातील मालमत्तेचे सर्व्हेक्षण मोहीम अद्याप सुरु आहे. महापालिकेचे क्षेत्रीय अधिकारी, 16 करसंकलन प्रशासन अधिकारी, लिपिक या सर्वांची मदतीने सुमारे 15 हजार मिळकती आढळून आलेल्या आहेत. यामध्ये नागरिकांनी वाढीव केलेली बांधकामे, वापरात केलेले बदल, तसेच बांधकामाची नसलेली नोंदणी अशा प्रकारे ही बांधकामे सर्व्हेक्षणात आढळून आलेले आहेत.
5 लाखापेक्षा थकबाकी असलेल्या दोन हजार 700 जणांना नोटीस
महापालिकेच्या करसंकलन विभागाला थकबाकी वसुलीत न्यायालयातील प्रलंबित प्रकरणांचा अडथळा होत आहे. 5 लाखाहून अधिक थकबाकी असलेल्या 2 हजार 700 जणांना महापालिकेने नोटीस बजावली आहे. त्यातील काही थकबाकींदाराकडे एक-दोन कोटींहून अधिक थकबाकी वसुली आहे. त्यात रुग्णालये, शैक्षणिक संस्था, कंपन्या, बड्या व्यक्तींकडून मिळकत कराबाबत न्यायालयात याचिका दाखल केल्या आहेत. हे दावे निकाली निघत नसल्याने ही थकबाकी वसूल करण्यास अडचण होत आहे. या प्रकरणाकडे आयुक्त श्रावण हर्डीकर यांनी लक्ष घातले आहे. घरपट्टी, पाणीपट्टी यासह अन्य थकबाकीदारांना नोटीस देत शनिवार (दि.13) लोकअदालतीचे आकुर्डी न्यायालयात आयोजन केले आहे.
नोंदणीबाबत विद्यमान सहायक आयुक्त अनभिज्ञ?
महापालिकेचे शहरात 16 कर संकलन केंद्रे आहेत. तत्कालीन आयुक्त श्रीकर परदेशी यांनी सन 2013 मध्ये महापालिकेच्या हद्दीतील मालमत्तेचे सर्व्हेक्षण केले होते. त्या सर्व्हेक्षणात आढळलेल्या 82 हजार 181 मिळकतींपैकी 14 हजार 169 मिळकतींना अद्यापही कर आकारणी केलेली नाही. तसेच काही मालमत्तेचे जागा मालक आढळून येत नसल्याने त्या मिळकतीच्या नोंदी अद्याप बाकी आहेत. त्या मालमत्तेचा नोंदणीबाबत विद्यमान सहायक आयुक्त प्रवीण आष्टीकर अनभिज्ञ आहेत. तसेच त्या-त्या प्रभागातील नगरसेवकांचा पालिका कर्मचाऱ्यांना अडथळा येवू लागला आहे. नगरसेवकांनी मिळकतींची नोंद करताना कर्मचाऱ्यांना बांधकामाच्या नोंदी कागदोपत्री कमी दाखविण्याच्या सूचना पालिकेच्या कर्मचाऱ्यांना केल्या जात आहेत. त्यामुळे महापालिकेला नाहक भुर्दंड सहन करावा लागत आहे.