आंबेडकर आणि फुले जयंतीचा खर्च टाळून विद्यार्थ्यांना शिष्यवृत्ती सुरू करा
पिंपरी, (महा-ई-न्यूज) – पिंपरी-चिंचवड महापालिकेच्या वतीने डॉ. बाबासाहेब आंबेडकर आणि महात्मा फुले जयंतीनिमित्त आयोजित सांस्कृतीक कार्यक्रमावर होणारा लाखो रुपयांचा अनाठायी खर्च टाळून दोन्ही महापुरूषांच्या नावाने विद्यार्थ्यांसाठी शिष्यवृत्ती सुरू करावी, अशी मागणी पिंपरी-चिंचवड महापालिका आयुक्त श्रावण हार्डीकर यांच्याकडे केली आहे.
यासंदर्भात रयत विचार मंचच्या वतीने दिलेल्या निवेदनात म्हटले आहे की, ११ एप्रिल ते १५ एप्रिल कालावधीत पिंपरी-चिंचवड महापालिकेच्या वतीने क्रांतिसूर्य महात्मा फुले व भारतरत्न डॉ.बाबासाहेब आंबेडकर यांचा सांस्कृतिक जयंती मोहत्सव भरविला जातो. जयंती मोहत्सवाला लाखो रुपये खर्च केले जातात. महात्मा फुले व डॉ. बाबासाहेब आंबेडकर यांची जयंती संपूर्ण देशात साजरी केली जाते. ती करायलाच पाहिजे.
जयंती मोहत्सव कार्यक्रमाचा अनावश्यक खर्च टाळण्यात यावा. क्रांतिसूर्य महात्मा फुले व भारतरत्न डॉ. बाबासाहेब आंबेडकर विशेष शिष्यवृत्ती योजना तयार करण्यात यावी. सांस्कृतीक महोत्सवाचा संपूर्ण खर्च शिष्यवृत्तीवर खर्च करावा.
दरवर्षी उच्चशिक्षण घेणाऱ्या जातीत जास्त १० व कमीत कमी ५ विद्यार्थ्यांना ती शिष्यवृत्ती देण्यात यावी. हीच खरी दोन्ही महापुरूषांना आदरांजली ठरेल, असे रयत विचार मंचचे अध्यक्ष धम्मराज साळवे यांनी निवेदनात नमूद केले आहे.