शेअर बाजार गडगडला! गुंतवणूकदारांच्या 6.32 लाख कोटी रुपयांचा चुराडा
![The stock market crashed! 6.32 lakh crore worth of investors](https://mahaenews.com/wp-content/uploads/2022/03/share-market.png)
मुंबई | रशिया-युक्रेन युद्धाचा परिणाम जगभरातील शेअर बाजार यासोबतच भारतीय शेअर बाजारावर कायम असल्याचा दिसून येत आहे. परिणामी भारतीय शेअर बाजार आज चांगलाच गडगडला. आज शेअर बाजार बंद होताना सेन्सेक्स 1,402 अंकांनी घसरला आहे तर निफ्टी 366 अंकानी घसरला आहे. सेन्सेक्समध्ये 2.58 टक्क्यांची घसरण होऊन तो 52931.07 वर पोहोचला आहे तर निफ्टीमध्ये 2.25 टक्क्यांची घसरण होऊन तो 15879.30 वर पोहोचला आहे. याचा मोठा तोटा गुंतवणूकदारांना होत असून आज एकाच दिवसात गुंतवणूकदारांचे 6.32 लाख कोटी रुपयांचे नुकसान झाले.
आज बाजार बंद होताना मेटल सोडले तर इतर सर्वच क्षेत्रामध्ये 2 ते 5 टक्क्यांची घसरण झाली आहे. बीएसई मिडकॅपमध्ये आणि स्मॉलकॅपमध्ये प्रत्येकी 2 टक्क्यांची घसरण झाली आहे. आज 837 कंपन्यांच्या शेअर्समध्ये वाढ झाली आहे तर 2543 शेअर्समध्ये घसरण झाली आहे. 129 कंपन्यांच्या शेअर्सच्या किंमतीत कोणताही बदल झाला नाही.
रशिया-युक्रेन युद्धामुळे आंतरराष्ट्रीय पातळीवरच्या कच्च्या तेलाच्या किंमतीमध्ये मोठी वाढ झाली आहे. त्याचा परिणाम देशातील इंधनाच्या किंमतीवर होणार असून येत्या काहीच दिवसांमध्ये देशातील पेट्रोल आणि डिझेलच्या किंमतीमध्ये 10 ते 12 रुपयांची वाढ होण्याची शक्यता आहे. या संभाव्य वाढीचा परिणाम हा शेअर बाजारावर होत असल्याची शक्यता काहीजणांनी वर्तवण्यात आले आहेत.