मुंबईः निवृत्त सैनिकाने पत्नी आणि मतिमंद मुलीची गळा चिरून केली हत्या; मोठ्या मुलीला फोन करत म्हणाला…
हा माजी सैनिक रात्रभर त्या मृतदेहांसोबत राहिला.
मुंबई | मुंबईत रविवारी एका ८९ वर्षीय निवृत्त सैनिकाने पत्नी आणि मतिमंद मुलीची चाकूने हत्या केली. यानंतर रात्रभर तो त्या मृतदेहांसोबत राहिला. सोमवारी सकाळी त्यांनी आपल्या दुसऱ्या मुलीला घटनेची माहिती दिली. ५८ वर्षीय मुलीच्या म्हणण्यानुसार, वृद्ध वडिलांनी फोन करून मला माफ करण्यास सांगितले आणि पोलिसांना घटनेची माहिती दिली.या प्रकरणातील माहितीनुसार, पुरुषोत्तम सिंग गंधोक नावाचा वृद्ध व्यक्ती त्याची आजारी पत्नी जसबीर कौर (८१) आणि मतिमंद मुलगी कमलजीत कौर (५५) यांच्यासोबत अंधेरी पूर्व, मुंबईतील शेर-ए-पंजाब कॉलनीत राहत होता. पत्नी आणि मुलीची हत्या करणाऱ्या गंधोकच्या शेजाऱ्यांच्या म्हणण्यानुसार, त्यांचं खूप वय झालं होतं आणि घरात ते एकटेच सर्वांची काळजी घेत होते. म्हातारपणामुळे त्यांना घरातली सगळी कामं जमत नव्हती.
पोलिसांनी दिलेल्या माहितीनुसार, पुरुषोत्तम सिंग गंधोक पूर्वी लष्करात होते आणि १९७१ च्या भारत-पाकिस्तान युद्धातही त्यांचा सहभाग होता. नोकरीवर असताना पायाला गोळी लागल्याने त्यांनी १९७६ मध्ये सैन्य सोडले. मग अनेक वर्षे मुंबईत गाडी चालवली आणि दुकान उघडले, पण म्हातारपणासमोर हार मानली. गेल्या २० वर्षांपासून ते त्यांची आजारी पत्नी जसबीर कौर (८१) आणि मतिमंद मुलगी कमलजीत कौर (५५) यांची काळजी घेत होते.
मेघवाडी पोलिस ठाण्याचे वरिष्ठ निरीक्षक रवींद्र कुडपकर यांनी दिलेल्या माहितीनुसार, रविवारी ६/७ फेब्रुवारीच्या रात्री झोपेत असताना गंधोक याने पत्नी आणि मुलीचा गळा चाकूने चिरून खून केला. गंधोक यांनी पोलिसांना सांगितले की, “घरातील सर्व कामे करून आणि त्या दोघांचा सांभाळ करून थकलो होतो. मी मेलो तर त्यांची सेवा कोण करणार, अशी चिंता त्यांना वाटत होती.” आरोपीने रागाच्या भरात हा गुन्हा केल्याचे पोलिसांनी सांगितले.
या प्रकरणात, पोलीस सूत्रांनी सांगितले की, घटनेच्या दुसऱ्या दिवशी सकाळी दुसरी मुलगी गुरविंद कौर आणि तिचा मुलगा जय आनंद गंधोक येथे गेले तेव्हा आरोपीने तिला सांगितले- “मला माफ कर. मी दोघींना मारून टाकले. माझ्याकडून घरची सगळी कामं होत नव्हती. म्हणून मी दोघांना मारून दुःखातून मुक्त केलं.”
वरिष्ठ निरीक्षक रवींद्र कुडपकर यांनी सांगितले की, काही दिवसांपूर्वी गंधोकच्या मुलीने वडील गंधोक यांच्या घरी एक पुरुष मदतनीसही ठेवला होता, पण दोन दिवसांनी त्यांनी काम सोडले. वरिष्ठ निरीक्षकांच्या म्हणण्यानुसार तपास पथक या प्रकरणाचा तपास करत असून संबंधित लोकांचे जबाब नोंदवले जात आहेत. हत्येसाठी वापरलेला चाकू अद्याप जप्त करण्यात आला नसून, घर आणि परिसरात शोधमोहीम सुरू आहे.
