मुंबई| गदग एक्स्प्रेसने चालुक्य एक्सप्रेसला धडक दिल्याने मुंबईतील दादर आणि माटुंगा रेल्वे स्थानकांदरम्यान मोठा अपघात झाला आहे. या धडकेनंतर दादर-पुद्दुचेरी चालुक्य एक्सप्रेसचे मागील तीन डब्बे घसरले असून मध्य रेल्वेची लोकल सेवा आणि लांब पल्ल्याच्या वाहतुकीला मोठा फटका बसला आहे. धीम्या मार्गावरील वाहतूक शुक्रवारी रात्री उशिरा सुरू करण्यात आली असून जलद मार्ग मात्र बंद ठेवण्यात आला आहे. दरम्यान, जनशताब्दी, इंद्रायणी आणि मांडवी यासह अनेक एक्स्प्रेस रद्द करण्यात आल्या आहेत.
गदग एक्स्प्रेस छत्रपती शिवाजी महाराज टर्मिनस येथून तर चालुक्य एक्स्प्रेस दादर येथून सुटली होती. रात्री पावणेदहाच्या सुमारास या गाड्यांचा अपघात झाला. दादर-माटुंगा दरम्यान जलद रेल्वेमार्गावर झालेल्या या अपघाताची चौकशी करण्यासाठी उच्चस्तरिय समिती नियुक्त करण्यात आली आहे. ही समिती या अपघाताची चौकशी करून त्याचा सविस्तर अहवाल मध्य रेल्वेकडे सादर करणार आहे. सिग्नल ओलांडल्यामुळे हा अपघात झाल्याची माहिती समोर आली असून मात्र अपघाताचे नेमके कारण चौकशी अंती समोर येईल, अशी माहिती रेल्वे अधिकाऱ्यांनी दिली.
धीम्या मार्गावरील वाहतूक सुरू
दादर-माटुंगा दरम्यान रेल्वे अपघात झाल्यावर सुरक्षेच्या कारणास्तव उपनगरीय रेल्वेची जलद आणि धीम्या मार्गावरील वाहतूक काही वेळेसाठी बंद करण्यात आली होती. धीम्या मार्गावरील लोकल फेऱ्या पावणे दहा वाजता बंद करण्यात आल्या होत्या. पावणे अकरा वाजण्याच्या सुमारास अप आणि डाऊन धीम्या मार्गावरील लोकल वाहतूक सुरू करण्यात आली, अशी माहिती मध्य रेल्वेने दिली.
उद्घोषणा सुरू
मुंबई उपनगरीय मार्गावरील जलद मार्गावरील लोकल फेऱ्या पुढील सूचना मिळेपर्यंत बंद राहणार आहेत, अशी उद्घोषणा रेल्वे स्थानकांवर करण्यात येत आहे. जलद मार्ग बंद असल्याने धीम्या मार्गावरील लोकलमध्ये प्रवेश करण्यासाठी दादर, कुर्ला, घाटकोपर, ठाणे, दिवा, डोंबिवली, कल्याण या स्थानकांवरील प्रवाशांना मनस्ताप सहन करावा लागला.
दोन्ही गाड्या रद्द
दादर-माटुंगा दरम्यान झालेल्या रेल्वे अपघातामुळे गाडी क्रमांक ११००५ छत्रपती शिवाजी महाराज टर्मिनस ते गदग एक्स्प्रेस आणि गाडी क्रमांक १११३९ दादर-पुद्दुचेरी चालुक्य एक्स्प्रेस रद्द करण्यात आल्या आहेत. संबंधित प्रवाशांना त्यांचा परतावा थेट बँक खात्यात किंवा रेल्वे स्थानकातील तिकीट खिडकीवर देण्यात येईल.
लोकल आज रविवार वेळापत्रकानुसार
दादर-माटुंगा रेल्वे अपघातामुळे आज, शनिवारी (१६ एप्रिल) मुंबई उपनगरीय रेल्वेवरील मध्य रेल्वेच्या मुख्य मार्गावर (छत्रपती शिवाजी महाराज टर्मिनस ते कल्याण / कर्जत/ कसारा) रविवार वेळापत्रकानुसार लोकल चालवण्यात येणार आहेत.
या गाड्या रद्द
दादर-माटुंगा रेल्वे अपघातामुळे (२२१४७) दादर शिर्डी साईनगर, (१७६१८) मुंबई नांदेड तपोवन, (२२१०६) मुंबई-पुणे इंद्रायणी, ( १२८६०) हावडा मुंबई गीतांजली, (१०१०४) मडगाव-मुंबई मांडवी, (२२१२०) करमळी-मुंबई तेजस, (१२०५२) मडगाव-मुंबई जनशताब्दी, ( ११०५८) अमृतसर-मुंबई या एक्स्प्रेस रद्द करण्यात आल्या आहेत.
