‘अमेरिकेतील मराठी शाळांना महाराष्ट्र शासनातर्फे अभ्यासक्रम देऊ’; सांस्कृतिक कार्यमंत्री आशिष शेलारांचे आश्वासन
सॅन फ्रान्सिस्को : अमेरिकेतील मराठी शाळांना महाराष्ट्र शासनातर्फे अभ्यासक्रम देऊ, तसंच मुख्यमंत्री देवेंद्र फडणवीस आणि राज्याचे शालेय शिक्षण मंत्री दादा भूसे यांच्याशी चर्चा करुन महाराष्ट्र शासनाचं आवश्यक ते सहकार्य करण्याचं आश्वासन राज्याचे माहिती तंत्रज्ञान आणि सांस्कृतिक कार्य मंत्री आशिष शेलार यांनी दिलं. अमेरिका दौऱ्यावर असणाऱ्या शेलार यांनी कॅलिफोर्निया राज्यातील सॅन फ्रान्सिस्को इथल्या बे एरिया इथे मराठी शाळा चालवणाऱ्या महाराष्ट्र मंडळाच्या पदाधिकाऱ्यांची त्यांनी भेट घेतली. त्यावेळी ते बोलत होते.
यासंदर्भात त्यांनी ट्विट करत माहिती दिली आहे. त्यांनी म्हटले आहे की, “अमेरिकेतील कॅलिफोर्निया राज्यातील सॅन फ्रान्सिस्को येथील बे एरिया येथे आज मला मराठी भाषेवर नितांत प्रेम करणारी मराठी माणसे भेटली, त्यांचे मराठी भाषेवरील प्रेम पाहून खूप आनंद झाला.”
हेही वाचा – ‘राज्य सर्वच महत्त्वाच्या आर्थिक क्षेत्रांमध्ये अग्रेसर’; मुख्यमंत्री देवेंद्र फडणवीस
पुढे त्यांनी म्हटले आहे की, “अमेरिका दौऱ्यात आज बे एरियातील महाराष्ट्र मंडळातर्फे चालवल्या जाणाऱ्या मराठी शाळेची माहिती घेतली. सेवा भावाने एकत्र आलेली मराठी माणसे आपल्या मुलांना मराठी भाषा, संस्कृती, इतिहास आणि आपल्या महाराष्ट्रातील लोकपरंपरा शिकवून “मराठीचा संस्कार” आपल्या नव्या पिढीवर व्हावा म्हणून इथे शाळा चालवतात. सन 2005 पासून ही शाळा चालवली जाते, त्यांच्या शाळेत 300 विद्यार्थी इथे मराठी शिकत आहेत. अमेरिकेत अशा 50 हून अधिक शाळा या मराठीच्या असून काही सेवा भाव ठेवून इथली मराठी माणसे या शाळा चालवत आहेत.”
पुढे मंत्री शेलार यांनी म्हटले आहे की, “अमेरिकेतील स्थानिक प्रशासनाला जर महाराष्ट्र शासनाने शिफारस केली तसेच अभ्यासक्रम उपलब्ध करुन दिला तर मराठी भाषा शिकवणे, परिक्षा व प्रमाणपत्र विद्यार्थ्यांना देणे सुलभ होईल, असे या शाळेच्या पदाधिकाऱ्यांनी या भेटीत लक्षात आणून दिले. मुख्यमंत्री देवेंद्र फडणवीस आणि आमच्या शालेय शिक्षण मंत्र्यांशी आम्ही चर्चा करुन महाराष्ट्र शासनाचे आवश्यक ते सहकार्य व शिफारस, अभ्यासक्रम नक्की देऊ असे येथील महाराष्ट्र मंडळाला आश्वस्त केले.”
