कचरा वेचणाऱ्याने परत केले युवतीचे पैसे
![](https://mahaenews.com/wp-content/uploads/2018/04/resizemode-3.jpg)
मुंबई : ‘साहेब मी गरीब आहे, पण प्रामाणिकही आहे,’ असं म्हणत ठाणे रेल्वे स्थानकात एका कचरा वेचणाऱ्या माणसाने एका युवतीचा महिन्याभराचा पगार स्टेशन मास्तरांना परत केला.
विश्वजीत गुप्ता ठाणे रेल्वे स्थानकाच्या रुळांवर कचरा वेचण्याचं काम करतो. कचरा वेचताना त्याला एक हँडबॅग सापडली. त्याने उघडून पाहिलं तर त्यात क्रेडिट, डेबिट कार्डांसह २ हजार रुपयांच्या १६ नोटा होत्या. विश्वजीत म्हणाला, ‘इतके पैसे बघून माझे डोळे चमकले, पण दुसऱ्याच क्षणी मनात विचार आला की ज्या कोणाची ही बॅग आहे, त्याचे काय हाल झाले असतील. मी लगेच बॅग स्टेशन मास्तरांकडे जमा करण्याचा निर्णय घेतला.’
ही बॅग आकांक्षा नावाच्या युवतीची होती. तिचा महिनाभराचा पगार त्या बॅगेत होता. लोअर परळला काम करणारी आकांक्षा ठाण्याला आपल्या घरी जात असताना गर्दीत ट्रेनमधून उतरताना बॅगेचं हँडल तुटल आणि बॅग रुळांवर पडली. तिला घरी पोहोचल्यावर हे लक्षात आलं. तिनं तत्काळ ठाणे स्थानकात असणाऱ्या आपल्या मित्राला फोन केला. तिचा मित्र स्टेशन मास्तर विजय रजक यांना भेटायला गेला, तेव्हाच नेमकं विश्वजीत बॅग जमा करत होता. नंतर आकांक्षाला बोलावून बॅग परत करण्यात आली. तिने विश्वजीतला ५०० रुपयांचं बक्षीस दिलं.