सोलापूरमध्ये शेतीमालास किफायतशीर किंमत मिळण्यासाठी विद्यापीठाकडून विशेष सॉफ्टवेअरची निर्मिती !
सोलापूर |
शेतकऱ्यांच्या शेतीमालाला आधारभूत किंमत मिळावी आणि त्यांना त्यांच्या कष्टाचा योग्य मोबदला मिळावा, यासाठी पुण्यश्लोक अहिल्यादेवी होळकर सोलापूर विद्यापीठाकडून विशेष सॉफ्टवेअरची निर्मिती करण्यात आली असून, त्याला भारत सरकारकडून स्वामित्व हक्क (पेटंट) प्राप्त झाले आहे. कुलगुरू डॉ. मृणालिनी फडणवीस यांनी ही माहिती दिली.
‘ॲन इंटिलीजेंट सिस्टीम अँड ए मेथड फॉर सिस्टिमेटिक डिस्ट्रिब्युशन ऑफ ॲग्रिकल्चर गुड्स ‘ असे या सॉफ्टवेअरचे नाव असून त्याला भारत सरकारच्या पेटंट कार्यालयाकडून स्वामित्व हक्क मिळाले आहे. कुलगुरू डॉ. फडणवीस आणि अर्थशास्त्र विभागाचे प्रमुख डॉ. प्रकाश व्हनकडे यांना यासंबंधी पत्र प्राप्त झाले आहे. शेतीमालाच्या तसेच विविध कृषी वस्तूंच्या किंमत निर्धारणसंबंधी आणि वितरणासंबंधी हे सॉफ्टवेअर उपयोगी ठरणार आहे. कोणत्या वेळी कोणते पीक घ्यावे, त्याचबरोबर विविध शेती मालाला कोणत्या कालावधीमध्ये भाव प्राप्त होतो तसेच कोणत्या विभागांमध्ये त्या पिकाला दर मिळतो हे विद्यापीठाकडून तयार करण्यात आलेले सॉफ्टवेअर मार्गदर्शन करू शकते.
- विभागनिहाय बाजारमूल्य आणि माहिती मिळणार…
“विभागनिहाय बाजारमूल्य आणि माहिती या विशेष सॉफ्टवेअरच्या माध्यमातून शेतकऱ्यांना मिळण्यास मदत होणार आहे. तसेच त्या माध्यमातून जिल्हानिहाय विक्री व वितरण व्यवस्था देखील सॉफ्टवेअरच्या माध्यमातून योग्य पद्धतीने करता येणार आहे. जेणेकरून शेतकऱ्यांच्या शेतीमालाला हमीभाव मिळून त्यांचा उत्पन्न वाढण्यासाठी या विशेष सॉफ्टवेअरची निर्मिती करण्यात आली आहे. त्याचा शेतकऱ्यांना निश्चितच फायदा होईल.”, असा विश्वास कुलगुरू डॉ. फडणवीस यांनी व्यक्त केला आहे.
- शासनाकडे प्रस्ताव सादर केला जाणार…
“विद्यापीठाकडून शेतीमालाच्या किफायतशीर किंमतीसाठी तयार करण्यात आलेल्या सॉफ्टवेअरचा शेतकऱ्यांना व शासनाला फायदा होण्यासाठी एक प्रस्ताव शासनाकडे सादर करण्यात येणार आहे.” असं डॉ. व्हनकडे यांनी सांगितले.