यवतमाळ | रेतीची तस्करी करणारा ट्रॅक्टर थांबविण्याचा प्रयत्न करणाऱ्या तलाठ्याला बेदम मारहाण करण्यात आली. ही खळबळजनक घटना शहरातील कळंब तालुक्यातील सावरगाव येथे सोमवार, दि. ४ एप्रिलला सायंकाळच्या सुमारास घडली. या प्रकरणी तलाठी मिलींद नामदेव लोहत रा. सावरगाव ता. कळंब यांनी दिलेल्या तक्रारीवरून पोलिसांनी मनोज महादेव भगत आणि मंथन मनोज भगत दोघेही रा. सावरगाव ता. कळंब यांच्यावर विविध कलमान्वये गुन्हे नोंद केले आहे.
कळंब तालुक्यातील सावरगाव येथील तलाठी मिलींद लोहत हे सोमवारी सायंकाळच्या सुमारास गावातील सावरगाव ते परसोडी मार्गावर असलेल्या एका दुकानात उभे होते. अश्यात भरधाव ट्रॅक्टर रेतीची वाहतूक करतांना त्यांना दिसला. त्यामुळे तलाठी मिलींद लोहत यांनी तो ट्रॅक्टर थांबविण्याचा प्रयत्न केला. मात्र, ट्रॅक्टर चालकाने तो ट्रॅक्टर न थांबविता चक्क सावरगाव येथील स्वत:च्या घरासमोर खाली केला. हा सर्व प्रकार तलाठी मिलींद लोहत यांनी आपल्या मोबाईलमध्ये कैद करत असतांना त्यांचा मोबाईल हिसकावण्याचा प्रयत्न करण्यात आला.
त्यानंतर तस्कर एवढ्यावरच थांबले नाहीत तर त्यांनी चक्क तलाठी मिलींद लोहत यांना लाथाबुक्याने मारहाण करण्यास सुरूवात केली. यावेळी तलाठी मिलींद लोहत यांचा चष्मा फोडून त्यांना जिवे मारण्याची धमकी देण्यात आली. या प्रकरणी तलाठी मिलींद लोहत यांनी दिलेल्या तक्रारीवरून कळंब पोलिसांनी त्या दोघांवर विविध कलमान्वये गुन्हे नोंद केले आहे. या प्रकरणाचा पुढील तपास ठाणेदार अजीत राठोड यांच्या मार्गदर्शनाखाली कळंब पोलिस करीत आहे.
