मनोज जरांगे पाटलांची भाषणादरम्यान प्रकृती खालावली, उपचारासाठी रूग्णालयात दाखल
Manoj Jarange Patil : मराठा आंदोलक मनोज जरांगे पाटील यांनी गेल्या काही दिवसांपासून राज्यभरात जाहीर सभा घेण्याचा सपाटा लावला आहे. काल लातूर जिल्ह्यातील माकनी आणि मुरूड येथे त्यांनी सभा घेतली. यानंतर बीड जिल्ह्यातील अंबाजोगाई येथे सभा घेण्यासाठी आले होते. सभेदरम्यानच त्यांची प्रकृती अचानक खालावली. दरम्यान, त्यांना रूग्णालयात उपचारासाठी दाखल करण्यात आले.
अंबाजोगाईमधील थोरात रुग्णालयात जरांगे पाटील यांच्यावर उपचार सुरू आहेत. सततचा प्रवास आणि दगदगीमुळे अशक्तपणा जाणवत असल्याचे येथील डॉक्टरांनी सांगितले. पीटीआय वृत्तसंस्थेला डॉ. थोरात यांनी दिलेल्या माहितीनुसार, जरांगे पाटील यांना रुग्णालयात दाखल केले त्यावेळी त्यांना बोलताही येत नव्हते. १७ दिवस उपोषण केल्यानंतर ते सतत फिरत आहेत. त्यांची शुगर कमी झालेली आहे. त्यांची परिस्थिती काळजी करण्यासारखी आहे. आम्ही रक्त चाचण्या केल्या आहेत. त्याचा अहवाल आल्यानंतर पुढची उपचाराची दिशा ठरविण्यात येईल.
VIDEO | Maratha quota activist Manoj Jarange admitted to a hospital in Beed after his health deteriorated. pic.twitter.com/ipqLskE3v2
— Press Trust of India (@PTI_News) December 12, 2023
हेही वाचा – Mumbai-Pune Expressway : मुंबई पुणे द्रुतगती मार्गावर गॅन्ट्री बसविण्यासाठी आज पुन्हा ब्लॉक
अंबाजोगाई येथील सभेत मनोज जरांगे पाटील नेमकं काय म्हणाले?
खूप उपोषणं केल्यामुळं शरीर साथ देत नाही. तरी यातून मी बरा होईल. बहुतेक सरकार त्याचे ऐकून आपल्यावर अन्याय करण्याच्या विचारत दिसत आहे. आपल्यावरील गुन्हे मागे घेऊ म्हणाले, तेही घेतले नाहीत. मी माझ्या गोरगरीब मराठ्यांच्या लेकराच्या वेदना मांडत आहे. मला फक्त समाजासाठी आरक्षण हवे. माझ्या जिवात जीव असेपर्यंत एक इंचही मागे हटणार नाही, हा शब्द आहे माझा.
मला डॉक्टरांनी दोन-तीन महिने आराम करण्यास सांगितले आहे. माझ्या किडनी आणि यकृताला सूज आल्याचे डॉक्टरांचे म्हणणे आहे. पण विजयाचा क्षण जवळ आला असताना मी जर आता आराम केला तर माझ्या गोरगरीब मराठ्यांच्या लेकरांचे वाटोळं होईल. त्यामुळं जीवाची पर्वा न करता मी जागृती करण्यासाठी राज्यभर फिरत आहे. मागच्या दोन-तीन दिवसांत माझी प्रकृती ठिक नाही, त्यामुळे मला अनेकांना भेटता येत नाहीये. पण माझा जीव जरी धरणीला पडला, तरी मी मराठा आरक्षण मिळवून देणारच, असं मनोज जरांगे पाटील म्हणाले.