नांदेडमध्ये खळबळ! पोलिसांवर गुन्हेगाराचा तलवारीने हल्ला, गोळीबारात आरोपी जखमी
![Farxadda Nanded! Weerar seef dambiyeed lagu qaaday booliiska, oo lagu eedeeyay in lagu dhaawacay toogashada](https://mahaenews.com/wp-content/uploads/2022/04/Farxadda-Nanded.jpg)
नांदेड | नांदेड शहर गुन्हेगारीच्या आणखी एका घटनेने हादरले आहे. काही दिवसांपूर्वीच प्रसिद्ध बांधकाम व्यावसायिक संजय बियाणी यांची भरदिवसा गोळ्या झाडून हत्या करण्यात आली होती. आता आरोपींनी थेट पोलिसांवरच तलवारीने हल्ला केल्याची घटना घडली आहे. रेकॉर्डवरील गुन्हेगारांचा शोध घेत असताना पोलिसांवर हल्ला करण्यात आला. पोलिसांचा वाहनावर दगडफेकही झाली.
रेकॉर्डवरच्या गुन्हेगारांचा पोलिस शोध घेत होते. यावेळी वसरणी भागात पोलिसांवरच तलवारीने हल्ला करण्यात आला. आरोपी संजुसिंघ बावरी याने पोलिसांवर तलवारीने हल्ला केला. या हल्ल्यात पोलिस कर्मचारी शिवा पाटील यांच्या खांद्यावर तलवारीचा वार लागला. यामुळे ते जखमी झाले. तर सहाय्यक पोलिस निरीक्षक संकेत दिघे हे थोडक्यात बचावले. यावेळी पोलिसांनी जीव धोक्यात असल्याचे पाहून अखेर आरोपी बावरीवर गोळीबार केला. पोलीस निरीक्षक अशोक घोरबांड यांनी गोळी झाडली. या घटनेत जखमी झालेल्या पोलिस कर्मचाऱ्यावर शासकीय रुग्णालयात उपचा सुरू आहेत.
संजय बियाणी यांच्या हत्येनंतर पोलिसांनी शहरासह जिल्ह्यातील रेकॉर्ड असणाऱ्या गुन्हेगारांची धरपकड सुरू केली आहे. अनेक गुन्ह्यांमध्ये आरोपी असलेला संजुसिंघ बावरी याला पकडण्यासाठी ग्रामीण पोलीस ठाण्याचे पथक वासारणी येथे गेले होते. बावरी हा त्याच्या घरी असताना पोलिसांनी त्याला पकडण्याचा प्रयत्न केला. पण संजूसिंघ बावरी याने पोलिसांवर तलवारीने हल्ला केला. यावेळी पोलिस कर्मचारी शिवा पाटील यांच्या खांद्यावर तलवारीचा वार लागला.
बावरी याने पोलिसांवर हल्ला केल्यानंतर पोलिस निरीक्षक अशोक घोरबांड यांनी त्याच्यावर गोळी झाडली. यात आरोपी बावरी याच्या पायाला गोळी लागली आणि तो गंभीर जखमी झाला. जखमी आरोपी आणि जखमी पोलिस कर्मचाऱ्यावर विष्णुपुरी येथील शासकीय रुग्णालयात उपचार सुरू आहेत. या घटनेनंतर शासकीय रुग्णालयात पोलिसांचा मोठा पोलिस बंदोबस्त तैनात करण्यात आला आहे.