वाकड पोलिसांची मोठी कामगिरी; १६ गुन्ह्यातील फरार आरोपी गजाआड
पिंपरी : गुजरातमधील १६ गुन्ह्यात फरार असणारे घरफोडीचे दोन सराईत गुन्हेगारांना पिंपरी-चिचंवड पोलिसांनी अटक केली आहे. ६० तोळे वजनाचे सोने व चांदीचे दागिने तसेच रोख रक्कम व मोटर सायकल असा एकूण मिळून २४ लाख ६८ हजार ४०० रुपयांचा मुद्देमाल आरोपींकडून हसगत करण्यात आला आहे.
पिंपरी चिंचवड पोलिसांनी घरफोडी प्रकरणात सहभागी असलेल्या दोन भावांना अटक केली असून, पिंपरी चिंचवडमध्ये गेल्या काही दिवसांत अशाच प्रकारच्या १६ गुन्ह्यांची उकल केली आहे. लखनसिंग कृपालसिंग सरदार (२८) आणि सतपालसिंग कृपालसिंग सरदार (२६, दोघे रा. गुजरातमधील महेसाणा) अशी अटक केलेल्या आरोपींची नावे आहेत. त्यांना वाकड पोलिसांनी रावेत येथून अटक केली.
गेल्या महिन्यात वाकड परिसरातील सरकारी क्वॉर्टरमध्ये घर फोडल्याच्या घटनेची पोलीस चौकशी करत होते. या परिसरातून ६.२५ लाख रुपयांचे सोने, चांदी आणि रोकड चोरीला गेल्याची माहिती समोर आली आहे.
तपासादरम्यान रावेत परिसरात आरोपी असल्याची गुप्त माहिती वाकड पोलीस ठाण्याच्या अधिकाऱ्यांना मिळाली. आरोपी परिसरातील दुसरे घर लुटण्यासाठी आले होते परंतु ते त्यांचे काम पूर्ण करण्याआधीच त्यांची वाट पाहत असलेल्या पोलिसांच्या पथकाने त्यांना पकडले.
गेल्या काही दिवसांत पिंपरी चिंचवडमध्ये घरफोडीच्या १५ घटना आणि वाहन चोरीच्या एका गुन्ह्यांसह एकूण १६ गुन्हेगारी प्रकरणांमध्ये पोलिसांनी त्यांचा सहभाग उघड केला आहे. तपासादरम्यान, आरोपी भाऊ गुजरातमध्येही वाँटेड असल्याचे समोर आले असून, गुजरातच्या गुन्हे शाखेचे अधिकारी त्यांचा शोध घेत आहेत. वाकड पोलिसांनी गुजरात पोलिसांशी समन्वय साधला आणि गुजरातमध्ये अशाच प्रकारच्या १६ गुन्ह्यांमध्ये आरोपींवर गुन्हा दाखल केल्याचे उघड झाले.
पिंपरी चिंचवड पोलिसांनी त्यांच्या ताब्यातून २४.६८ लाख रुपये किमतीचे सोने, चांदी आणि रोख रक्कम जप्त केली आहे. अटक आरोपींना स्थानिक न्यायालयात हजर केले असता न्यायालयाने त्यांना १३ मार्चपर्यंत पोलीस कोठडी सुनावली आहे.
