नाशिक: मुले पळवणाऱ्या टोळ्या कार्यरत असल्याबाबत सोशल मीडियावर अफवा पसरवून समाजात भीतीचे वातावरण निर्माण करणाऱ्या समाजकंटाकांविरोधात थेट गुन्हे दाखल करण्याचा इशारा शहर आणि ग्रामीण पोलिस दलाने दिला आहे. मुलांना पळविणाऱ्या कोणत्याही टोळ्या शहर, जिल्हा वा इतर ठिकाणी नसून, नागरिकांना कोणतीही शंका असल्यास त्यांनी थेट पोलिसांशी संपर्क साधावा, असे आवाहन करण्यात आले आहे.
मुले पळविणाऱ्या टोळ्या कार्यरत असल्याच्या अफवा सोशल मीडियाच्या माध्यमातून राज्यभरात पसरविल्या जात आहेत. परिणामी अनेक गावांमध्ये अनोळखी व्यक्तींवर हल्ले होत आहेत. धुळे जिल्ह्यात तर जमावाने केलेल्या हल्ल्यात पाच भिक्षेकरींना प्राणास मुकावे लागले. हल्ल्यांचे प्रकार निव्वळ अफवांमुळे होत असून, असे मेसेज अथवा फोटोग्राफ्स फॉरवर्ड करण्यात आल्याचे आढळून आल्यास संबंधितांवर सायबर अॅक्टप्रमाणे थेट गुन्हे दाखल करण्यात येणार आहे.
नागरिकांनी केवळ ऐकीव माहितीवरून अफवांवर विश्वास न ठेवता कायदा हातात घेऊ नये. कोणी व्यक्ती संशयास्पद वाटली तर कायदा हातात न घेता, खाली दिलेल्या पोलिसांच्या क्रमाकांवर माहिती द्यावी. नागरिकांनी कोणतीही भीती न बाळगता पोलिसांना सहकार्य करावे, असे आवाहन शहर आणि ग्रामीण पोलिसांनी केले आहे.
