राष्ट्रवादी काॅंग्रेसकडून 80 विधानसभा मतदारसंघात उमेदवारांची निश्चिती

पुणे – राष्ट्रवादी काँग्रेसने आगामी विधानसभा निवडणुकीची जय्यत तयारी सुरू केली आहे. निवडणूक जाहीर होण्यास तब्बल तीन महिन्यांचा अवकाश असला तरी सुमारे ८० विधानसभा मतदारसंघातील उमेदवारांची निश्चिती करण्यात आली आहे. या इच्छुकांना येत्या पंधरा दिवसात त्यांची उमेदवारी निश्चित असल्याचा स्पष्ट संदेश देण्यात येणार असल्याचे उच्चपदस्थ सूत्रांनी सांगितले.

राष्ट्रवादी काँग्रेसने विधानसभा निवडणुकीच्या पार्श्वभूमीवर उमेदवार निश्चिती करण्याकडे जोरदार लक्ष घातले आहे. त्यामध्ये राष्ट्रवादी काँग्रेसचे कट्टर कार्यकर्ते तसेच तरुण चेहऱ्यांना संधी देण्याबरोबरच निवडून येण्याचा निकष लक्षात घेण्यात येत आहे. उमेदवारी जाहीर केल्यानंतर संबंधित उमेदवार बंडखोरी करत दुसऱ्या पक्षातून लढणार नाहीत, अशा उमेदवारांची नावे जाहीर करण्याचा विचार राष्ट्रवादी काँग्रेसमध्ये सुरू आहे. त्यानुसार राज्यभरातील ८० विधानसभांचे उमेदवार निश्चित करण्यात आल्याचे सूत्रांनी सांगितले. यामध्ये पश्चिम महाराष्ट्र, उत्तर महाराष्ट्र, मराठवाडा येथील सर्वाधिक उमेदवारांचा समावेश असल्याचे सांगण्यात येत आहे.

आगामी निवडणुकीतही काँग्रेस-राष्ट्रवादी काँग्रेसची आघाडी होणार असल्याचे स्पष्ट आहे. या जागा वाटपांमध्ये या वेळी राष्ट्रवादी काँग्रेसकडून काँग्रेसच्या तुलनेत अधिक जागांवर तयारी सुरू केली आहे. राष्ट्रवादी काँग्रेसने २००९ साली ११४ जागा लढविल्या होत्या. तर २०१४ च्या निवडणुकीत काँग्रेस-राष्ट्रवादी काँग्रेसची आघाडी नव्हती. त्यामुळे या निवडणुकीत ‘राष्ट्रवादी’कडून १४४ पेक्षा अधिक जागा लढविल्या जातील, असे सध्याचे चित्र आहे. या जागांपैकी ८० ठिकाणचे उमेदवार निश्चित करण्यात आले असून, त्यांना तयारीसाठी पुरेसावेळ मिळावा म्हणून उमेदवारी दिल्याचा स्पष्ट संदेश देण्यात येणार असल्याचे सूत्रांनी सांगितले.