शशी थरुरांना ‘या’ मराठी नेत्याचा पाठिंबा! उमेदवारी अर्ज भरताना दिल्लीत उपस्थिती
![Support of 'Ya' Marathi leader to Shashi Tharoor! Presence in Delhi while filing nomination form](https://mahaenews.com/wp-content/uploads/2022/10/Fd6QmgzaUAIySTn-780x461.jpg)
काँग्रेस अध्यक्षपदासाठी उमेदवारी अर्ज दाखल करणारे डॉ. शशी थरूर हे दोन दिवसांच्या नागपूर दौऱ्यावर येणार आहेत. दौऱ्यादरम्यान ते दीक्षाभूमीला भेट देणार आहेत, अशी माहिती काँग्रेसचे नेते डॉ. आशीष देशमुख यांनी दिली. नवी दिल्ली येथे डॉ. शशी थरूर यांनी काँग्रेसच्या अध्यक्षपदाच्या निवडणुकीसाठी शुक्रवारी उमेदवारी अर्ज भरला. त्यावेळी त्यांच्यासोबत डॉ. देशमुख उपस्थित होते.
सावनेर मतदारसंघात पक्षविरोधी कारवाई केल्याच्या आरोपाने ते चर्चेत आले होते. त्यानंतर विधान परिषदेतील पराभवाला प्रदेशाध्यक्ष नाना पटोले यांना जबाबदार धरून त्यांच्या राजीनाम्याची मागणी त्यांनी केली होती. त्यांनी राज्यसभेवर महाराष्ट्रातून उत्तर प्रदेशातील व्यक्तीला पाठवण्याच्या पक्षाच्या निर्णयावरही टीका केली होती. आता ते शशी थरूर यांच्या समर्थनार्थ दिल्लीत पोहोचले. थरूर यांच्या दौऱ्याबाबत त्यांनीच माहिती दिली. १ व २ ऑक्टोबरला शशी थरूर नागपूरच्या दौऱ्यावर येत आहेत. त्यांचे विचार ऐकण्यासाठी समस्त काँग्रेस पदाधिकारी, नेते व कार्यकर्त्यांनी अवश्य यावे, असे आवाहन डॉ. देशमुख यांनी केले आहे.