ट्रम्प आत असतानाच व्हाईट हाऊसबाहेर भीषण गोळीबार; सिक्रेट सर्व्हिसच्या कारवाईत हल्लेखोर ठार
White House Shooting | अमेरिकेचे सत्ताकेंद्र आणि राष्ट्राध्यक्ष डोनाल्ड ट्रम्प यांचे अधिकृत निवासस्थान असलेल्या ‘व्हाईट हाऊस’च्या परिसरात शनिवारी झालेल्या एका भीषण गोळीबाराने संपूर्ण अमेरिका हादरली आहे. व्हाईट हाऊसच्या मुख्य सुरक्षा तपासणी नाक्याजवळ एका संशयित हल्लेखोराने अंदाधुंद गोळीबार केला. यावर गुप्तहेर खात्याच्या (Secret Service) एजंट्सनी तात्काळ प्रत्युत्तराची कारवाई करत संशयित हल्लेखोराला जागीच ठार केले. या गोळीबारात एका निष्पाप नागरिकाला दुखापत झाली असून सुरक्षेच्या कारणास्तव संपूर्ण व्हाईट हाऊस परिसर तात्काळ लॉकडाऊन करण्यात आला होता.
या थरारक घटनेच्या वेळी अमेरिकेचे राष्ट्राध्यक्ष डोनाल्ड ट्रम्प हे व्हाईट हाऊसच्या आतमध्येच उपस्थित होते. मात्र, राष्ट्राध्यक्षांसह सुरक्षेच्या गराड्यात असलेल्या सर्वच महत्त्वाच्या व्यक्ती पूर्णपणे सुरक्षित असल्याचे प्रशासनाने स्पष्ट केले आहे.
भीषण गोळीबाराचा सविस्तर घटनाक्रम:
गेटजवळ संशयास्पद हालचाली: शनिवारी सायंकाळी ६ वाजण्याच्या सुमारास एक बंदूकधारी व्यक्ती पश्चिम बाजूच्या व्हाईट हाऊसच्या गेटजवळ आली. अंदाजे सायंकाळी ६:१० वाजता १७ व्या स्ट्रीट नॉर्थवेस्टवर ही व्यक्ती वेड्यावाकड्या पद्धतीने चालताना दिसली, ज्याची ओळख नंतर सिक्रेट सर्व्हिसने पटवली.
हेही वाचा
राज्यातील धरणांमध्ये ३०.८८ टक्के पाणीसाठा; पुणे विभाग सर्वात कमी पाणी
अंधाधुंद गोळीबार: या बंदूकधाऱ्याने अचानक आपली हँडगन (पिस्तूल) बाहेर काढली आणि सुरक्षा रक्षकांच्या दिशेने रोखत तीन वेळा गोळीबार केला. व्हाईट हाऊसजवळ त्याने अनेक गोळ्या झाडल्यामुळे परिसरात एकच खळबळ उडाली.
सिक्रेट सर्व्हिसचे चोख प्रत्युत्तर: गोळीबार होताच युनायटेड स्टेट्स सिक्रेट सर्व्हिसच्या एजंट्सनी काही सेकंदांतच वेगाने हालचाल करत प्रत्युत्तरा दाखल गोळ्या झाडल्या आणि हल्लेखोराला ठार केले. या चकमकीदरम्यान एका सामान्य नागरिकालाही गोळी लागली असून तो जखमी झाला आहे. ठार झालेल्या संशयिताला तात्काळ जॉर्ज वॉशिंग्टन रुग्णालयात नेण्यात आले.
पत्रकारांची पत्रकार परिषद खोलीत धाव
गोळीबाराचा आवाज ऐकू येताच सिक्रेट सर्व्हिसने अत्यंत तत्परता दाखवली. त्यांनी व्हाईट हाऊसच्या आवारात चित्रीकरण करणाऱ्या पत्रकारांना उत्तरेकडील लॉनवर एकत्र करून सुरक्षिततेसाठी थेट पत्रकार परिषदेच्या खोलीत (Press Briefing Room) धाव घेण्याचे निर्देश दिले.
घटनास्थळी उपस्थित असलेल्या एका रिपोर्टरने सांगितले, “मी व्हाईट हाऊसच्या नॉर्थ लॉनवरून एका सोशल व्हिडिओसाठी माझ्या आयफोनवर चित्रीकरण करत असतानाच अचानक गोळीबाराचा प्रचंड आवाज ऐकू आला.” तर ‘एनबीसी न्यूज’च्या वार्ताहर ज्युली सिर्किन यांनी या गोंधळाच्या परिस्थितीत साधारण २० ते ३० गोळ्या झाडल्या गेल्याचा अंदाज वर्तवला आहे. या घटनेनंतर व्हाईट हाऊसच्या बाहेरील सुरक्षा व्यवस्था अत्यंत कडक करण्यात आली असून तपास यंत्रणा या हल्ल्याच्या मुख्य उद्देशाचा शोध घेत आहेत.
महाईन्यूज-X वर फॉलो करा : महाईन्यूजला instagram वर फॉलो करा
