#CoronaVirus: प्रवासी करोनामुक्त झाला, पण ह्रदय बंद पडून गतप्राण
करोना विषाणूच्या प्रादुर्भावामुळे सध्या देशभरात आणीबाणीची परिस्थिती निर्माण झालेली आहे. खबरदारीचा उपाय म्हणून केंद्र आणि राज्य सरकार आवश्यक ती पावलं उचलत आहेत. महाराष्ट्रात अत्यावश्यक सेवा वगळता, सर्व गोष्टी बंद करण्याचा निर्णय राज्य सरकारने घेतला आहे. पंतप्रधान नरेंद्र मोदी यांनीही देशवासियांना गरज नसल्यास घराबाहेर पडू नका असं आवाहन केलं आहे. राजस्थानच्या भिलवाडा मध्ये एक दुर्दैवी घटना घडली आहे.
काही दिवसांपूर्वी राजस्थानमध्ये फिरायला आलेल्या ६९ वर्षीय इटालियन नागरिकाला करोनाची लागण झाल्याचं निष्पन्न झालं होतं. यानंतर स्थानिक रुग्णालयात उपचार केल्यानंतर त्याच्या तब्येतीमध्ये सुधारणा झाल्याचंही डॉक्टरांनी जाहीर केलं होतं. यानंतर ह्रदय बंद पडल्यामुळे जयपूरमधील एका रुग्णालयात या इटालियन नागरिकाला आपले प्राण गमवावे लागले आहेत. या घटनेमुळे भिलवाडा परिसरात भीतीचं वातावरण निर्माण झालेलं आहे. महत्वाची गोष्ट म्हणजे खासगी रुग्णालयातील तीन डॉक्टरांनाही करोनाची लागण झाल्याचं निष्पन्न झालंय.
