अल्पवयीन मुलासह तरूणाने केली होती प्रौढाची हत्या; सात दिवसानंतर लागला आरोपींचा छडा
![An adult was killed by a young man with a minor; After seven days, the accused was released](https://mahaenews.com/wp-content/uploads/2022/04/अल्पवयीन-मुलासह-तरूणाने-केली-होती-प्रौढाची-हत्या-सात-दिवसानंतर-लागला.jpg)
जळगाव : तुम्ही दोघं वयाने लहान असून तुम्ही दारु का पित आहे उठा येथून असे बोलून अल्पवयीन तरुणासह त्याच्यासोबत दारु पिणार्याला हटकले. त्याचा राग मनात ठेवून त्या दोघांनी दिनेश भीकन पाटील वय ४४ रा. रामेश्वर कॉलनी जळगाव यांच्या डोक्यात दगड टाकून खून केला होता. एमआयडीसी पोलिस स्टेशन व स्थानिक गुन्हे शाखेने या खुनाच्या घटनेचा उलगडा केला असून १५ वर्षीय अल्पवयीन मुलासह तांबापुरातील एका तरुणाला अटक केली आहे. दुलेश्वर उर्फ आनंद सदाशिव माळी (वय२१, रा. तांबापुर) असे अटकेतील एका संशयित तरुणाचे नाव आहे.
शहरातील मेहरुण तलाव परिसरात दिनेश भिकन पाटील (वय ४४, रा. रामेश्वर कॉलनी, ह. मु. टोळी ता. पारोळा) यांचा दगडाने ठेचून खून केल्याची घटना दि. ९ एप्रिल रोजी घडली होती. याप्रकरणी गुन्हा दाखल झाल्यानंतर एमआयडीसी पोलीस ठाण्याचे कर्मचारी व स्थानिक गुन्हे शाखा यांच्याकडून समांतर तपास सुरु होता. संशयितांबाबत कुठलाही भौतिक पुरावा नसल्यामुळे गुन्ह्याचा उलगडा करण्यास अनेक अडचणी येत होत्या.
तांबापुरा परिसरातील एका अल्पवयीन मुलाने हा खून केल्याची माहिती स्थानिक गुन्हे शाखेचे पोलिस निरीक्षक किरणकुमार बकाले यांना मिळाली. त्यानुसार त्यांनी लागलीच तांबापुरा परिसरातून त्या १५ वर्षीय अल्पवयीन मुलाला ताब्यात घेतले. त्याची कसून चौकशी केली असता त्याने हा खून त्याचा साथीदार दुलेश्वर उर्फ आनंद माळी याच्यासोबत केल्याची कबुली दिली.
मद्यप्राशन का करता असे दोघांना हटकणे बेतले जीवावर…
मेहरुण तलाव परिसरातील डॉ. जैन यांच्या फार्म हाऊसच्या भिंतीच्या आडोशाला मयत दिनेश पाटील हे झाडाखाली दारु पित होते. तिथेच थोड्या अंतरावर दुलेश्वर उर्फ आनंद माळी हा देखील अल्पवयीन मुलासह दारु पित होते. यावेळी दिनेश यांनी त्या दोघांना उद्देशून लहान असून दारु का पित आहेत असे हटकले. आणि हेच हटकणे दिनेश पाटील यांच्या जिवावर बेतले. बोलण्याचा राग मनात ठेवून त्या दोघांनी दिनेश यांच्या डोक्यात दगड टाकून त्यांची निर्घूण हत्या केली. अशी कबुली दोघांनी अटकेनंतर पोलिसांना दिली. दोघांना एमआयडीसी पोलिसांच्या स्वाधीन करण्यात आले आहे. संशयित आनंद माळी यास रविवारी जळगाव जिल्हा न्यायालयात हजर केले असता न्यायालयाने त्यास २० एप्रिल पर्यंत पोलीस कोठडी सुनावली आहे. पथकाने लावला खुनाचा छडा…
पोलीस अधीक्षक डॉ. प्रवीण मुंढे, अपर पोलीस अधीक्षक चंद्रकांत गवळी, पोलीस उपअधीक्षक कुमार चिंथा यांच्या मार्गदर्शनाखाली स्थानिक गुन्हे शाखेचे पोलीस निरीक्षक किरणकुमार बकाले, पोलीस उपनिरीक्षक अमोल देवडे, अशोक महाजन, विजयसिंग पाटील, जितेंद्र पाटील, सुधाकर अंभोरे, अक्रम शेख, राहूल पाटील, विजय पाटील, प्रितम पाटील, भारत पाटील, विजय चौधरी, दर्शन ढाकणे यांच्यासह एमआयडीसी पोलीस ठाण्याच्या गुन्हे शोध पथकाने दिवस-रात्र मेहनत करत या गुन्ह्याचा छडा लावला व दोघांना अटक केली.