खुशखबर! ‘या’ कर्जाच्या रकमेत वाढ, हजारो लाभार्थ्यांना मिळणार कर्ज
मुंबई : सामाजिक न्याय व विशेष सहाय्य विभागांतर्गत कार्यरत असलेल्या संत रोहिदास चर्मोद्योग व चर्मकार विकास महामंडळामार्फत चर्मकार समाजातील (चांभार, गोची, ढोर व होलार) व्यक्तींच्या आर्थिक, शैक्षणिक व सामाजिक विकासासाठी एनएसएफडीसीच्या योजनांसाठी कर्जाच्या रकमेत वाढ करण्यात आली आहे.
तसेच सन २०२३-२४ या आर्थिक वर्षासाठी राष्ट्रीय अनुसूचित जाती वित्त व विकास महामंडळाच्या (एनएसएफडीसी) राज्य व केंद्र सरकारच्या योजनेसाठी ४,८०० लाभार्थ्यांना कर्ज वाटपाचे उद्दिष्ट देण्यात आलेले आहे, अशी माहिती महामंडळाचे व्यवस्थापकीय संचालक धम्मज्योती गजभिये यांनी प्रसिद्धीस दिलेल्या पत्रकान्वये दिली आहे.
हेही वाचा – ‘..ही बाळासाहेबांची शेवटची इच्छा होती’; नितीन गडकरी यांचं विधान चर्चेत
या योजनांतील मुदती कर्ज योजनेअंतर्गत लहान उद्योग 1 लाख रुपये, दीड लाख व २ लाख रुपये, चर्मोद्योग २ लाख रुपये, लघुऋण वित्त योजना व महिला समृध्दी योजना प्रत्येकी ५० हजार रुपये देण्यात येतील. मुदती कर्ज योजनेअंतर्गत लहान उद्योगासाठी ५ लाख रुपये, लघुऋण वित्त योजना व महिला समृध्दी योजना प्रत्येकी १.४० लाख प्रकल्प मर्यादा तसेच एनएसएफडीसी यांची महिलांकरीता ५ लाखांची नव्याने महिला अधिकारिता योजना सुरू करण्यात आली आहे.
तसेच शैक्षणिक कर्ज योजनेमध्ये वाढ झाली असून देशामध्ये शिक्षणासाठी २० लाख व परदेशात शिक्षणासाठी ३० लाखांपर्यंत कर्ज मिळणार असल्याची माहिती श्री. गजभिये यांनी दिली आहे. अधिक माहितीसाठी नजीकच्या जिल्हा कार्यालयाला भेट द्यावी, असं आवाहनही करण्यात आलं आहे.