महेश मांजरेकर यंदाच्या बिग बॉस मराठीतून बाहेर

मुंबई : बिग बॉस मराठी या शोच्या पाचव्या सीझनची प्रेक्षक आतुरतेनं वाट बघत होते. त्यांची प्रतीक्षा आता संपली आहे. त्याच्या नव्या सीझनची नुकतीच घोषणा झाली. इतकंच नव्हे तर या सीझनचा होस्टसुद्धा बदलला आहे.

लोकप्रिय अभिनेता रितेश देशमुख पाचव्या पर्वाचं सूत्रसंचालन करणार आहे. गेल्या काही वर्षांपासून रितेश मराठी मनोरंजनविश्वाशी चांगल्याप्रकारे जोडला गेला आहे. त्यामुळं आता तो या कार्यक्रमातूनही मराठी कलाकार आणि प्रेक्षकांशी संवाद साधता दिसणार आहे.
बिग बॉस मराठीच्या पाचव्या पर्वाचा पहिला प्रोमो समोर येताच प्रेक्षकांसाठी हा धक्काच होता, दिग्दर्शक महेश मांजरेकर यांच्या जागी रितेश देशमुख हा शो होस्ट करणार असल्याचं समोर आल्यानंतर चर्चेला उधाण आलं. मांजरेकरांनी हा शो का सोडला, याचं काय कारण असावं? असे अनेक प्रश्न प्रेक्षक सोशल मीडियावर विचारत होते, अखेर त्यांच्या प्रश्नाचं उत्तर मिळालं आहे.

महेश मांजरेकर यंदाचा सीझन होस्ट करणार नाहीत, याचं एक कारण म्हणजे येत्या काही महिन्यात ते वेगवेगळ्या चित्रपटांच्या कामांमध्ये व्यग्र आहेत. त्यामुळं बिग बॉससाठी वेळ देणं त्यांना शक्य होणार नव्हतं. नुकत्याच दिलेल्या मुलाखतीत मांजरेकरांनी त्यांच्या आगामी प्रोजेक्ट्सबद्दल सांगितलं.

मांजरेकर म्हणाले की, मी सध्या मणिरत्नम यांचा ‘ठग लाइफ’ हा चित्रपट करतोय. सोबतच एका कन्नड प्रोजेक्टवरही काम करतोय. दिल्ली, लंडन, बँकॉक या ठिकाणी या कलाकृतींचं शूटिंग होत आहे. येणारे दोन-तीन महिने त्यासाठीच बाहेर असणार आहे. तसंच मनात दोन-तीन विषय सातत्यानं घोळत असतात. हे काम संपताच, माझ्या कलाकृतींचं काम सुरू करेन. मांजरेकरांच्या या उत्तरामुळे ते बिग बॉस मराठी का होस्ट करणार नाही, याचं उत्तर प्रेक्षकांना मिळालं आहे, असं म्हणायला काही हरकत नाही.

नवा बिग बॉस
दरम्यान, हा नवा ‘बिग बॉस’ दर शनिवारी घरातील सदस्यांची शाळा घेणार की आणखी वेगळ्या पद्धतीनं समजवणार?, तसंच शोचं स्वरुपही बदलणार आहे का, या गोष्टी लवकरच समजतील. शो सुरू होण्याची तारीख अद्याप सांगितली नसली तरी लवकरच तो सुरू होईल असं दिसतंय. कारण पाचवा सीझन यायला तसा काहीसा उशीर झाल्यामुळं प्रेक्षक त्याबाबत विचारत होतेच. आता नवा सीझन आणि नवा होस्ट यामुळं पुन्हा एकदा ‘बिग बॉस मराठी’ची चर्चा होऊ लागली आहे.