होळीपूर्वी सोनं-चांदी खरेदीची सुवर्णसंधी! चांदी 5000 रुपयांनी स्वस्त, तर सोन्यातही मोठी घसरण; जाणून घ्या ताजे दर
Silver Gold Rate | होळीचा सण अवघ्या काही दिवसांवर आला असतानाच, सोनं आणि चांदी खरेदी करणाऱ्या ग्राहकांसाठी एक अत्यंत आनंदाची बातमी समोर आली आहे. गुरुवारी सकाळी शेअर बाजारासह कमोडिटी मार्केटमध्ये मंदीचे वातावरण पाहायला मिळाले आणि मौल्यवान धातूंच्या किमतीत मोठी घसरण झाली. सेन्सेक्स आणि निफ्टी हे दोन्ही निर्देशांक सकाळी वेगाने उघडले असले, तरी काही मिनिटांतच ते रेड झोनमध्ये आल्याने बाजारात मोठी उलथापालथ झाली.
एमसीएक्स (MCX) मार्केट उघडताच चांदीच्या दरात तब्बल 5000 रुपयांहून अधिक घसरण झाल्याने ग्राहकांना मोठा दिलासा मिळाला आहे. बुधवारी बाजार बंद होताना असलेल्या दरांच्या तुलनेत आज 1 किलो चांदीचे दर सुमारे 5804 रुपयांनी कमी होऊन 2,78,364 रुपयांवर आले आहेत. विशेष म्हणजे 29 जानेवारी रोजी चांदीने 4,20,048 रुपयांचा उच्चांक गाठला होता, ज्यामध्ये आतापर्यंत तब्बल 1,47,488 रुपयांची ऐतिहासिक घसरण नोंदवली गेली आहे.
हेही वाचा : अजित पवारांचा अपघात हा सदोष मनुष्यवधच; खासदार संजय राऊतांचा आरोप
चांदीसोबतच सोन्याच्या किमतीनेही ग्राहकांना सुखद धक्का दिला असून, 2 एप्रिल रोजी संपणाऱ्या एमसीएक्स वायदे बाजारात सोन्याचे दर खाली आले आहेत. काल 1,61,145 रुपये प्रति 10 ग्रॅमवर बंद झालेले सोने आज सकाळी 1,60,516 रुपयांवर उघडले, म्हणजेच 24 कॅरेट सोने 629 रुपयांनी स्वस्त झाले. 29 जानेवारी रोजी सोन्याने 1,93,096 रुपयांचा ऐतिहासिक टप्पा गाठला होता, तिथून आतापर्यंत सोन्याच्या दरात एकूण 32,580 रुपयांची मोठी घसरण पाहायला मिळाली आहे.
राज्यातील प्रमुख शहरांमधील आजचे ताजे दर पाहिले, तर मुंबई, पुणे आणि नागपूरसह इतर शहरांमध्ये सोन्याचे दर ग्राहकांना आकर्षित करणारे आहेत. या शहरांमध्ये आज 24 कॅरेट सोन्यासाठी प्रति ग्रॅम 16,168 रुपये, तर 22 कॅरेट सोन्यासाठी 14,820 रुपये मोजावे लागणार आहेत. तसेच 18 कॅरेट सोन्याचा आजचा भाव 12,126 रुपये प्रति ग्रॅम इतका असून, होळीच्या सणासाठी दागिने घडवणाऱ्या ग्राहकांसाठी ही एक उत्तम संधी मानली जात आहे.
दुसरीकडे देशाची राजधानी दिल्लीसह नोएडा, गाझियाबाद आणि चंदीगड यांसारख्या उत्तर भारतातील शहरांमध्ये सोन्याचे दर थोडे वेगळे आहेत. या भागात 24 कॅरेट सोन्याचा भाव 16,183 रुपये आणि 22 कॅरेट सोन्याचा भाव 14,835 रुपये प्रति ग्रॅमवर पोहोचला आहे. तसेच 18 कॅरेट सोन्याचा भाव 12,141 रुपये प्रति ग्रॅम इतका नोंदवला गेला असून, सणासुदीच्या काळात या घसरलेल्या दरांचा फायदा घेण्यासाठी सराफा बाजारात ग्राहकांची गर्दी वाढण्याची शक्यता आहे.
