सिंगापूर : बहुचर्चित असलेली उत्तर कोरियाचा हुकुमशाह किम जोंग उन आणि अमेरिकेचे राष्ट्राध्यक्ष डोनाल्ड ट्रम्प यांची भेट येत्या काही दिवसांत होण्याची शक्यता आहे. दरम्यान, हे दोन्ही नेते १२ जूनलाच भेटणार, अशी माहिती समोर आली आहे. या दोन्ही नेत्यांची भेट झाल्यास हा प्रसंग आंतरराष्ट्रीय पातळीवर ऐतिहासिक ठरणार आहे.
गेल्या काही वर्षांपासून अमेरिका आणि उत्तर कोरिया यांच्यातील संबंधांमध्ये तणाव निर्माण झाला आहे. तसेच दोन्ही देशांच्या नेत्यांनी एकमेकांना युद्धाच्या धमक्या दिल्या होत्या, तर अमेरिकेने कोरियन सागरामध्ये आपल्या युद्ध नौका देखील सज्ज केल्या होत्या.
दरम्यान, यापूर्वी डोनाल्ड ट्रम्प यांनी ही भेट रद्द केली होती. मात्र आता पुन्हा एकदा ही भेट होणार असे डोनाल्ड ट्रम्प यांनी जाहीर केले आहे. या दोन्ही देशांमध्ये अणु विषयावरून तणाव सुरु असल्याने डोनाल्ड ट्रम्प यांनी ही बैठक रद्द केली आहे असे म्हटले जात होते. तसेच गेल्या काही दिवसांपासून किम जोंग उन तणावपूर्ण वक्तव्य करीत असल्यामुळे देखील ही बैठक रद्द करण्यात आली असे म्हटले जात होते.
