इंधनावरील सबसीडी बंद करताच या ठिकाणी सुरू झाल्या दंगली जगभरात सध्या आर्थिक मंदीचे वारे वाहात आहेत. या मंदी सदृष्य परिस्थितीत टिकून राहाण्यासाठी अनेक देश आपल्या आर्थिक नियोजनात विविध प्रकारचे बदल करत आहेत. परंतु भविष्यकाळ सुरक्षित राहावा यासाठी केले जाणारे हे बदल वर्तमानात मात्र अनेकदा नागरिकांसाठी त्रासदायक ठरतात. अशीच काहीशी परिस्थिती इक्वाडोर या देशात निर्माण झाली आहे.
इक्वाडोर येथे वित्तीय धोरणांमध्ये सुधारणा करण्यासाठी सरकारने दोन बिलियन डॉलर्सची घोषणा केली आहे. या घोषणेमुळे गेल्या अनेक दशकांपासून सुरू असलेले इंधनावरील विशेष अनुदान बंद करण्यात आले आहे. इंधनावरील अनुदान बंद करताच देशात दंगली उसळल्या आहेत. देशातील विविध भागात लोक रस्त्यावर उतरुन तोडफोड करत आहेत. प्रदर्शन करणाऱ्यांनी सरकारी मालमत्तेचे नुकसान करण्यास सुरुवात केली आहे. जागोजागी आगी लागल्या जात आहेत. दंगल करणाऱ्या नागरिकांना नियंत्रणात आणण्यासाठी राष्ट्रपती लेनिन मोरेनो यांनी देशात आणीबाणीची घोषणा केली आहे.
