अलहाबाद – 2019 मध्ये होणाऱ्या कुंभमेळ्यात 221 दलित महिला आणि 300 दलित पुरुष सहभागी होणार असून त्यातील पाच महिलांना मौनी अमावस्येच्या आधीच महामंडलेश्वर उपाधी बहाल करण्यात येणार आहे. या आधीही 500 महिलांसहित शेकडो दलितांनी या जुन्या आखाड्याचे सदस्यत्व स्वीकारलेले आहे.
देशातील या सर्वात जुन्या आखाड्यात तीन महिलांसहित 8 दलित संतही आहेत. त्यातीलच पाच जणांना महामंडलेश्वराची उपाधी देऊन गौरविण्यात येणार आहे. या वर्षी एप्रिलमध्ये कन्हैय्या ऊर्फ शिवानंद गिरी यांना पहिले दलित संन्यासी म्हणून आखाड्यात सहभागी करून घेण्यात आले होते. आता त्यांना महामंडलेश्वराची उपाधी देण्यात येणार आहे. या आखाड्यात देशभरातून 75 लाख लोक सहभागी होतात.
दरम्यान, जुना आखाड्याचे मुख्य संरक्षक महंत हरी गिरी यांनी यावेळी राजकारण्यांवर टीका केली. सध्याचे राजकारणी समाजामध्ये जात आणि धर्माच्या नावावर फूट पाडत आहेत. जन्म नव्हे तर कर्मावर जात ठरते, असा आखाड्याचा विश्वास असल्याचे महंत हरी गिरी यांनी सांगितले.
