ज्ञानेश कुमार यांना पदावरून हटवण्याची मागणी; राहुल गांधींचा भाजपला थेट इशारा, म्हणाले, ‘जनता हे विसरणार नाही’

नवी दिल्ली : मुख्य निवडणूक आयुक्त ज्ञानेश कुमार यांच्याविरोधात विरोधकांनी पुकारलेल्या आंदोलनाच्या पार्श्वभूमीवर लोकसभेतील विरोधी पक्षनेते राहुल गांधी यांनी भाजपला थेट इशारा दिला आहे. ज्ञानेश कुमार मुख्य निवडणूक आयुक्तपद सांभाळू शकणार नाहीत. विरोधकांनी केलेल्या खुलाशांनंतरही भाजपने त्यांना पदावर कायम ठेवण्याचा आग्रह धरल्यास त्यामागील डाव आम्ही ओळखू, असे राहुल गांधी म्हणाले.

भाजप निवडणुकीत हेराफेरी करत राहू शकतो; मात्र देशातील जनता आणि विरोधी पक्षाचे सदस्य हे विसरणार नाहीत किंवा माफही करणार नाहीत, असा इशाराही त्यांनी दिला. राजधानी दिल्लीत काँग्रेस अध्यक्ष मल्लिकार्जुन खर्गे यांच्या निवासस्थानी आयोजित प्रातिनिधिक संसदेत ते बोलत होते.

SIR प्रक्रियेत १३ कोटी मतदारांची नावे वगळल्याचा आरोप

राहुल गांधी यांनी मतदार यादीच्या विशेष सखोल पुनरावलोकन प्रक्रियेवर (SIR) प्रश्न उपस्थित केले. या प्रक्रियेद्वारे १३ कोटी म्हणजेच १५ टक्के मतदारांची नावे वगळण्यात आल्याचा आरोप त्यांनी केला. यापैकी अनेक मतदारांनी २०२४ च्या लोकसभा निवडणुकीत मतदान केले होते. त्या निवडणुकीतील विजयाचे अंतर केवळ तीन टक्के होते, असेही राहुल गांधी यांनी सांगितले.

हेही वाचा –  ओबीसींच्या २७ टक्के राजकीय आरक्षणाला धक्का न लावता निवडणुका घ्या; विजय वडेट्टीवार यांची सरकारकडे मागणी

ज्ञानेश कुमार यांच्याविरोधात विरोधकांचा प्रतिकात्मक महाभियोग

मल्लिकार्जुन खर्गे यांच्या निवासस्थानी आयोजित प्रातिनिधिक संसदेचे अधिवेशन तीन तास २३ मिनिटे चालले. माजी लोकसभा सभापती मीरा कुमार यांनी अध्यक्षस्थान भूषवले. यावेळी काँग्रेस अध्यक्ष मल्लिकार्जुन खर्गे यांनी मुख्य निवडणूक आयुक्त ज्ञानेश कुमार यांच्याविरोधात महाभियोगाचा प्रस्ताव मांडला. त्यांच्यावर सहा आरोप ठेवण्यात आल्याचे सांगण्यात आले.

या प्रस्तावाला उपस्थित खासदारांनी पाठिंबा दिला. काँग्रेससह १९ पक्षांचे २१५ खासदार या कार्यक्रमात सहभागी झाले होते. हा उपक्रम प्रतिकात्मक स्वरूपाचा होता. घटनात्मक पदावर असलेल्या व्यक्तीविरोधात जनता किंवा राजकीय पक्ष आपला विरोध व्यक्त करतात, अशा स्वरूपात सार्वजनिक महाभियोगाची संकल्पना मांडण्यात आली.

‘जनतेचा पाठिंबा आमच्यासोबत’

राहुल गांधी यांनी आपल्या भाषणात ज्ञानेश कुमार यांच्यावर टीका करताना पंतप्रधान नरेंद्र मोदी आणि केंद्रीय गृहमंत्री अमित शाह यांचाही उल्लेख केला. ज्ञानेश कुमार यांना मोदी आणि शाह वाचवतील असे वाटत असेल, तर देशात काय सुरू आहे आणि जनतेचा मूड काय आहे, हे त्यांनी पाहावे, असे राहुल गांधी म्हणाले.

‘तुम्ही मतांची चोरी करत राहता. मात्र, रस्त्यावर उतरलेले लोक त्यांच्यासोबत जे घडले ते कधीही विसरणार नाहीत. तुम्ही राष्ट्राच्या आत्म्यावर हल्ला केला आहे आणि यासाठी आम्ही तुम्हाला सोडणार नाही,’ अशा शब्दांत त्यांनी टीका केली.

संसदेत विरोधकांना बोलू दिले जात नसल्याचा आरोपही राहुल गांधी यांनी केला. लोकसभा आणि राज्यसभेत बोलण्याची संधी मिळत नसली, तरी जनतेचा पाठिंबा असल्यामुळे विरोधक आज एकत्र आले आहेत, असे ते म्हणाले.

मुख्य निवडणूक आयुक्तांविरोधातील महाभियोगावर चर्चा करण्यासाठी संपूर्ण विरोधी पक्षाला बागेत बसावे लागत आहे, कारण इतर सर्व संस्था आमच्यासाठी बंद आहेत, अशी टीकाही राहुल गांधी यांनी केली.

महाईन्यूज-X वर फॉलो करा : महाईन्यूजला instagram वर फॉलो करा