कॉक्रोच जनता पार्टीच्या सौरव दास आणि आशुतोष रांका यांच्या कोठडीत दोन दिवसांची वाढ; २१ ऑक्टोबरला पुढील सुनावणी

नवी दिल्ली : ‘कॉक्रोच जनता पार्टी’चे सह-संयोजक सौरव दास आणि आशुतोष रांका यांच्या न्यायालयीन कोठडीत आणखी दोन दिवसांची वाढ करण्यात आली आहे. पाच दिवसांची कोठडी पूर्ण झाल्यानंतर सोमवारी या दोघांना मंदिर मार्ग पोलीस ठाण्यातील विशेष कार्यकारी दंडाधिकारी न्यायालयात हजर करण्यात आले. दिल्ली पोलिसांनी कोठडी वाढवण्याची मागणी केल्यानंतर न्यायालयाने दोघांच्या कोठडीत दोन दिवसांची वाढ करण्याचा निर्णय घेतला. या प्रकरणाची पुढील सुनावणी २१ ऑक्टोबर रोजी होणार आहे.

पोलिसांचा कायदा-सुव्यवस्थेचा मुद्दा

सौरव दास आणि आशुतोष रांका यांना पुढील दोन दिवस तिहार तुरुंगात राहावे लागणार आहे. हे दोघे पुन्हा आंदोलनाची हाक देऊन कायदा आणि सुव्यवस्थेचा प्रश्न निर्माण करू शकतात, असा युक्तिवाद दिल्ली पोलिसांच्या वतीने करण्यात आला. दोन्ही बाजूंचे म्हणणे ऐकून घेतल्यानंतर न्यायालयाने पाच दिवसांऐवजी अतिरिक्त दोन दिवसांची कोठडी मंजूर केली.

हेही वाचा –  गोकुळ दूध संघावर सतेज पाटलांचा झेंडा! महायुतीला मोठा धक्का; २५ पैकी १४ जागांवर समविचारी आघाडीची बाजी

अभिजीत दिपके यांची सोशल मीडियावर प्रतिक्रिया

न्यायालयाच्या निर्णयानंतर कॉक्रोच जनता पार्टीचे संस्थापक अभिजीत दिपके यांनी ‘X’ या सोशल मीडिया प्लॅटफॉर्मवर पोस्ट करत सौरव दास आणि आशुतोष रांका यांना पाठिंबा दिला. पाच दिवस तुरुंगात राहूनही त्यांचे मनोबल खचले नसल्याचे त्यांनी आपल्या पोस्टमध्ये म्हटले.

दिपके यांनी पोस्टमध्ये लिहिले, “जंतरमंतरवर भारताचा राष्ट्रध्वज तिरंगा फडकवणे हा आशु आणि सौरवचा पहिला गुन्हा ठरवला गेला, तर माघार घेण्यास नकार देणे हा त्यांचा दुसरा गुन्हा? पाच दिवस तुरुंगात घालवल्यानंतरही ते जेव्हा न्यायालयात आले, तेव्हा त्यांच्या चेहऱ्यावर हसू होते आणि त्यांचा आत्मविश्वास ढळला नव्हता.”

२१ ऑक्टोबरच्या सुनावणीकडे लक्ष

या प्रकरणात दिल्ली पोलिसांनी कायदा-सुव्यवस्थेचा मुद्दा उपस्थित केला आहे, तर पक्षाच्या संस्थापकांनी दोन्ही सह-संयोजकांच्या भूमिकेचे समर्थन केले आहे. त्यामुळे या प्रकरणाची पुढील सुनावणी महत्त्वाची मानली जात आहे. २१ ऑक्टोबर रोजी न्यायालयात काय घडते, याकडे राजकीय वर्तुळाचे लक्ष लागले आहे.

महाईन्यूज-X वर फॉलो करा : महाईन्यूजला instagram वर फॉलो करा