पुणे पदवीधर-शिक्षकच्या उमेदवारांबाबत दोन दिवसांत निर्णय; चंद्रकांत पाटलांचं मोठं वक्तव्य

सांगली : महाराष्ट्र विधान परिषदेच्या पुणे पदवीधर आणि पुणे शिक्षक मतदारसंघाच्या निवडणुकीची घोषणा झाल्यानंतर महायुतीतील जागावाटपावरून राजकीय हालचालींना वेग आला आहे. भाजपचे ज्येष्ठ नेते आणि मंत्री चंद्रकांत पाटील यांनी या दोन्ही जागांबाबत महत्त्वाचे वक्तव्य केले आहे. पुणे पदवीधर आणि शिक्षक मतदारसंघासाठी भाजपचे उमेदवार दोन दिवसांत निश्चित होतील, असे पाटील यांनी सांगितले.

“पुणे पदवीधर आणि पुणे शिक्षक मतदारसंघाच्या दोन्ही जागा पारंपरिकरित्या आमच्याकडे आहेत. मात्र, महायुती म्हणूनच आम्ही निवडणूक लढणार असून अंतिम निर्णय आमचे नेते घेतील. देवेंद्र फडणवीस जो निर्णय घेतील, तो आम्हाला मान्य असेल,” अशी भूमिका चंद्रकांत पाटील यांनी मांडली.

पाटील यांच्या म्हणण्यानुसार, देवेंद्र फडणवीस, एकनाथ शिंदे आणि सुनेत्रा पवार यांच्यात चर्चा झाल्यानंतर दोन्ही जागांसाठी उमेदवार निश्चित केले जाणार आहेत. महायुतीतील भाजप, शिवसेना आणि राष्ट्रवादी काँग्रेस या घटकांमध्ये दोन्ही जागांवर इच्छुकांकडून तयारी सुरू आहे.

हेही वाचा –  विद्यार्थ्यांनी रेखाटला ‘स्वप्नातला भारत’

शिक्षक मतदारसंघासाठी अनेक इच्छुक

पुणे शिक्षक मतदारसंघासाठी शिंदे यांच्या शिवसेनेकडून मंगेश चिवटे यांनी तयारी सुरू केली आहे. त्याचबरोबर कौस्तुभ गावडे यांच्यासह अन्य इच्छुकांचीही नावे चर्चेत आहेत. पुणे पदवीधर मतदारसंघासाठी भाजपकडून शरद लाड यांच्या नावाची चर्चा सुरू असल्याचे वृत्त आहे. मात्र, उमेदवारीबाबत अंतिम निर्णय अद्याप झालेला नाही.

पुणे विभाग पदवीधर मतदारसंघात पुणे, सातारा, सांगली, सोलापूर आणि कोल्हापूर या जिल्ह्यांचा समावेश आहे. मागील २०२०च्या निवडणुकीत पदवीधर मतदारसंघातून राष्ट्रवादी काँग्रेसचे अरुण लाड, तर शिक्षक मतदारसंघातून काँग्रेसचे जयंत आसगावकर विजयी झाले होते.

२३ ऑक्टोबरला मतदान

निवडणूक आयोगाने जाहीर केलेल्या कार्यक्रमानुसार अधिसूचना २९ सप्टेंबर रोजी प्रसिद्ध होणार आहे. उमेदवारी अर्ज दाखल करण्याची अंतिम तारीख ६ ऑक्टोबर, अर्जांची छाननी ७ ऑक्टोबर, तर अर्ज मागे घेण्याची अंतिम तारीख ९ ऑक्टोबर आहे.

२३ ऑक्टोबर २०२६ रोजी सकाळी ८ ते दुपारी ४ या वेळेत मतदान होणार असून, २७ ऑक्टोबरला मतमोजणी होईल. संपूर्ण निवडणूक प्रक्रिया ३१ ऑक्टोबरपर्यंत पूर्ण होणार आहे.

दरम्यान, पुणे पदवीधर आणि शिक्षक मतदारसंघातील उमेदवारीवरून महायुतीत सुरू असलेल्या चर्चेला चंद्रकांत पाटील यांच्या वक्तव्यामुळे आणखी वेग आला आहे. आता भाजप, शिवसेना आणि राष्ट्रवादी काँग्रेसमधील चर्चेनंतर कोणाच्या नावावर शिक्कामोर्तब होते, याकडे लक्ष लागले आहे.

महाईन्यूज-X वर फॉलो करा : महाईन्यूजला instagram वर फॉलो करा