इराणवर अमेरिकेचे भीषण हवाई हल्ले; संतप्त इराणने होर्मुझची सामुद्रधुनी केली बंद!
US Airstrikes on Iran | मध्यपूर्वेत पुन्हा एकदा युद्धाचा भडका उडाला आहे. होर्मुझच्या सामुद्रधुनीतून जाणाऱ्या एका व्यापारी जहाजावर इराणच्या लष्कराने हल्ला केल्यानंतर, अमेरिकेने इराणविरुद्ध भीषण हवाई हल्ले सुरू केले आहेत. अमेरिकेने शनिवारी पहाटेपासून इराणमधील अनेक शहरांवर बॉम्बवर्षाव केला असून, चालू आठवड्यातील अमेरिकेची ही तिसरी मोठी लष्करी कारवाई आहे. या हल्ल्यांनंतर संतप्त झालेल्या इराणने जागतिक व्यापारासाठी अत्यंत महत्त्वाची मानली जाणारी ‘होर्मुझची सामुद्रधुनी’ (Strait of Hormuz) सर्व जहाजांसाठी पूर्णपणे बंद करण्याची घोषणा केली आहे.
अमेरिकेच्या सेंट्रल कमांडने (CENTCOM) दिलेल्या माहितीनुसार, शनिवारी पहाटे ५:४५ वाजता अमेरिकन हवाई दलाने इराणच्या विविध तळांवर हल्ले करण्यास सुरुवात केली. अमेरिकेचे राष्ट्राध्यक्ष डोनाल्ड ट्रम्प यांच्या थेट आदेशानुसार ही कारवाई करण्यात आल्याचे सेंट्रल कमांडने स्पष्ट केले आहे. इराणची व्यापारी जहाजांवर आणि नागरी खलाशांवर हल्ले करण्याची क्षमता समूळ नष्ट करणे हा या हल्ल्यांमागील मुख्य उद्देश असल्याचे अमेरिकेने म्हटले आहे.
जहाजावरील हल्ला ठरला कारणीभूत
होर्मुझच्या सामुद्रधुनीतून जाणाऱ्या सायप्रसचा ध्वज असलेल्या ‘एम/व्ही जीएफएस गॅलेक्सी’ (M/V GFS Galaxy) या कंटेनर जहाजावर इराणच्या ‘इस्लामिक रिव्होल्युशनरी गार्ड कॉर्प्स’च्या (IRGC) सैन्याने हल्ला केला होता. या हल्ल्यात जहाजावरील एक नागरी कर्मचारी बेपत्ता झाला आहे. तसेच, इराणच्या हल्ल्यामुळे जहाजाला मोठी आग लागली असून इंजिन रूमचे अतोनात नुकसान झाले आहे, ज्यामुळे हे जहाज पुढे प्रवास करू शकत नाही. या कृत्याचा बदला म्हणून अमेरिकेने इराणवर रणशिंग फुकले.
हेही वाचा
विनायक राऊत यांच्यासह 7 जणांविरोधात गुन्हा दाखल; सूनेचे जादूटोण्याचे गंभीर आरोप
“इराणला किंमत मोजावी लागणार”; संरक्षण मंत्री
अमेरिकेचे संरक्षण मंत्री पीट हेगसेथ यांनी ‘X’ (पूर्वीचे ट्विटर) वर पोस्ट करत इराणला कडक शब्दांत इशारा दिला आहे. ते म्हणाले, “इराणने व्यापारी जहाजावर हल्ला करून अत्यंत चुकीचा निर्णय घेतला आहे. आता त्यांना त्यांच्या या कृत्याची मोठी किंमत मोजावी लागणार आहे.”
इराणच्या अनेक शहरांमध्ये भीषण स्फोट
अमेरिकेच्या या हल्ल्यांमुळे दक्षिण इराणमधील अनेक शहरे हादरली आहेत. इराणच्या स्थानिक माध्यमांनी दिलेल्या वृत्तानुसार, बुशेहर, असालुये आणि चाबहारजवळ प्रचंड स्फोटांचे आवाज ऐकू आले. ‘मेहर न्यूज एजन्सी’ने केशम बेटावर स्फोट झाल्याची पुष्टी केली आहे, तर ‘आयआरआयबी’ (IRIB) वाहिनीने बंदर अब्बासमध्ये तीन आणि सिरिकमध्ये दोन मोठे स्फोट झाल्याचे सांगितले. याशिवाय, दक्षिण होर्मोज्गान प्रांतातील ‘जास्क’ या महत्त्वाच्या बंदर शहरात तब्बल १० पेक्षा अधिक स्फोटांचे आवाज ऐकू आल्याचे ‘आयआरएनए’ (IRNA) या वृत्तसंस्थेने म्हटले आहे.
इराणकडून होर्मुझची सामुद्रधुनी बंद; जागतिक चिंतेत भर
अमेरिकेच्या या आक्रमक पवित्र्याला उत्तर म्हणून इराणने जागतिक तेल वाहतुकीचा मुख्य मार्ग असलेली ‘होर्मुझची सामुद्रधुनी’ तात्काळ प्रभावाने बंद केली आहे. ‘इस्लामिक रिपब्लिक ऑफ इराण ब्रॉडकास्टिंग’ने दिलेल्या माहितीनुसार, जोपर्यंत या भागात अमेरिकेचा लष्करी हस्तक्षेप सुरू राहील, तोपर्यंत आयआरजीसी (IRGC) नौदल कोणत्याही व्यापारी किंवा इतर जहाजाला या मार्गातून जाऊ देणार नाही. इराणच्या या निर्णयामुळे आंतरराष्ट्रीय बाजारपेठेत खनिज तेलाचा पुरवठा खंडित होण्याची आणि जागतिक स्तरावर इंधनाचे दर कडाडण्याची मोठी भीती व्यक्त केली जात आहे.
महाईन्यूज-X वर फॉलो करा : महाईन्यूजला instagram वर फॉलो करा
