पिंपरी-चिंचवड विकास आराखडा नियोजन समितीवर नगरसेविका सारिका गायकवाड यांची नियुक्ती

पिंपरी-चिंचवड | पिंपरी-चिंचवड शहराच्या आगामी २० वर्षांच्या विकासाची दिशा ठरवणाऱ्या ‘शहर विकास आराखडा नियोजन समिती’वर (City Development Plan Committee) नगरसेविका सारिका गायकवाड यांची नियुक्ती करण्यात आली आहे. महापालिकेच्या सर्वसाधारण सभेत या निवडीवर शिक्कामोर्तब करण्यात आले असून, शहराच्या दीर्घकालीन विकास नियोजनात स्थानिक लोकप्रतिनिधींना महत्त्वाची संधी मिळाल्याचे मानले जात आहे.

भाजपा नेते तथा आमदार महेश लांडगे यांच्या मार्गदर्शनाखाली ही नियुक्ती करण्यात आल्याची माहिती असून, शहराच्या नियोजन प्रक्रियेत अनुभवी आणि सक्रिय महिला लोकप्रतिनिधींचा सहभाग वाढल्याचे यानिमित्ताने अधोरेखित झाले आहे. महापालिका सर्वसाधारण सभेत या नियुक्तीला मान्यता देण्यात आली.

शहराच्या विकास नियोजनात महिलांचा सक्रिय सहभाग

शहराचा वाढता विस्तार, लोकसंख्येचा वेग आणि नागरी सुविधांवरील वाढता ताण लक्षात घेता दीर्घकालीन विकास आराखडा अत्यंत महत्त्वाचा मानला जात आहे. अशा महत्त्वपूर्ण समितीत नगरसेविका सारिका गायकवाड यांना संधी मिळाल्याने स्थानिक प्रश्न, नागरिकांच्या अपेक्षा आणि प्रत्यक्ष क्षेत्रीय वास्तव यांचा समतोल साधण्यास मदत होणार असल्याचे बोलले जात आहे. नगरसेविका म्हणून कार्यरत असताना सारिका गायकवाड यांनी आपल्या प्रभागातील पायाभूत सुविधा, पाणीपुरवठा, रस्ते विकास आणि नागरी समस्यांवर सातत्याने काम केले आहे. या प्रत्यक्ष अनुभवाचा उपयोग आता शहराच्या व्यापक विकास आराखड्यात केला जाणार असून, नियोजन प्रक्रियेत स्थानिक पातळीवरील वास्तव अधिक प्रभावीपणे मांडले जाण्याची अपेक्षा व्यक्त केली जात आहे.

हेही वाचा

शहर विकास आराखडा समितीवर स्थायी समिती सभापती अभिषेक बारणे यांची निवड; पिंपरी-चिंचवडच्या विकासाचा ‘रोडमॅप’ ठरणार!

भाजपा नेते महेश लांडगे यांचे मार्गदर्शन

शहराच्या सर्वांगीण आणि शाश्वत विकासासाठी भाजपा नेते तथा आमदार महेश लांडगे यांनी दीर्घकालीन नियोजनावर सातत्याने भर दिला आहे. त्यांच्या मार्गदर्शनाखाली शहर विकास आराखडा प्रक्रिया पुढे जात असून, स्थानिक लोकप्रतिनिधींना महत्त्वाच्या समित्यांमध्ये संधी देऊन तळागाळातील प्रश्नांना न्याय देण्याचा प्रयत्न केला जात असल्याचे मानले जात आहे. विकास आराखडा तयार करताना नागरिकांच्या सूचना, हरकती आणि स्थानिक समस्यांचा सखोल विचार केला जाणार आहे. विविध सामाजिक संस्था, तज्ज्ञ आणि नागरिकांचा सहभाग घेऊन पारदर्शक आणि सर्वसमावेशक आराखडा तयार करण्यावर भर दिला जाणार आहे. नगरसेविका सारिका गायकवाड यांच्या समावेशामुळे महिलांचे प्रतिनिधित्व वाढले असून, शहर नियोजन प्रक्रियेत अधिक समावेशक दृष्टिकोन येईल, असा विश्वास व्यक्त केला जात आहे.

पिंपरी-चिंचवड शहराच्या भविष्यासाठी ही नियुक्ती माझ्यासाठी एक मोठी जबाबदारी आहे. आमदार महेश लांडगे यांचे आभार व्यक्त करते. पुढील २० वर्षांचा विचार करून शहराला जागतिक दर्जाच्या पायाभूत सुविधा, शाश्वत विकास आणि नागरिककेंद्रित नियोजन देणे हेच माझे ध्येय असेल. प्रत्येक प्रभागातील नागरिकांच्या अपेक्षा, समस्या आणि सूचना यांना केंद्रस्थानी ठेवून पारदर्शक आणि परिणामकारक विकास आराखडा तयार करण्यासाठी मी पूर्णपणे कटिबद्ध आहे. शहराच्या सर्वांगीण प्रगतीसाठी कोणतीही कसर ठेवली जाणार नाही.

– सारिका गायकवाड, नगरसेविका, भाजपा.

महाईन्यूज-X वर फॉलो करा : महाईन्यूजला instagram वर फॉलो करा