ODI World Cup 2027 च्या तारखा ठरल्या! पाहा कधी आणि कुठे होणार सामने..
ODI World Cup 2027 | क्रिकेट जगतातील सर्वात मोठी आणि कल्पक स्पर्धा म्हणजेच ‘आयसीसी एकदिवसीय विश्वचषक २०२७’ (ODI World Cup 2027) पुढील वर्षी दक्षिण आफ्रिका, झिम्बाब्वे आणि नामिबिया या तीन देशांच्या संयुक्त यजमानपदाखाली खेळवली जाणार आहे. आयसीसीने (ICC) अद्याप याची अधिकृत घोषणा केली नसली, तरी या मेगा स्पर्धेच्या विशिष्ट तारखा आता समोर आल्या आहेत. पुढील वर्षी ४ ऑक्टोबर ते २१ नोव्हेंबर २०२७ या कालावधीत हा विश्वचषक खेळवला जाण्याची दाट शक्यता आहे.
‘ईएसपीएनक्रिकइन्फो’च्या (ESPNcricinfo) वृत्तानुसार, गेल्या मे महिन्यात अहमदाबाद येथे झालेल्या आयसीसीच्या बैठकीत या तारखांबाबत एकमत झाले होते. येत्या जुलै महिन्यात होणाऱ्या आयसीसीच्या वार्षिक सर्वसाधारण सभेत (AGM) या वेळापत्रकावर अधिकृत शिक्कामोर्तब होण्याची शक्यता आहे.
एकूण ५४ सामने; दक्षिण आफ्रिकेत होणार सर्वाधिक मॅचेस
२००३ नंतर म्हणजेच तब्बल २४ वर्षांनंतर दक्षिण आफ्रिकेत आयसीसी पुरुष विश्वचषकाचे आयोजन होत आहे. या स्पर्धेत एकूण ५४ सामने खेळवले जाणार असून, तीन सह-यजमान देश असले तरी बहुतांश सामने दक्षिण आफ्रिकेतच होतील.
दक्षिण आफ्रिका
येथील ८ मैदानांवर सर्वाधिक ४१ सामने खेळवले जातील.
झिम्बाब्वे
येथे तीन वेगवेगळ्या ठिकाणी ८ ते १० सामने आयोजित केले जाऊ शकतात.
नामिबिया
येथे केवळ ३ सामने आयोजित करण्याबाबत विचार सुरू आहे.
हेही वाचा
मुंबई उपनगरात अतिक्रमण निष्कासन मोहिमेत १४ एकर जमीन मोकळी
२४ वर्षांनंतर ‘सुपर सिक्स’ फॉरमॅटची वापसी; असे असेल स्पर्धेचे स्वरूप
यंदाच्या विश्वचषकाचे सर्वात मोठे वैशिष्ट्य म्हणजे यात २०२३ च्या तुलनेत अधिक संघ पाहायला मिळतील. २०२३ मध्ये भारतात झालेल्या विश्वचषकात केवळ १० संघ होते, मात्र २०२७ मध्ये एकूण १४ संघ मैदानात उतरतील.
या स्पर्धेत २००३ च्या विश्वचषकाप्रमाणेच ‘सुपर सिक्स’ फॉरमॅटची वापसी होणार आहे. सर्वप्रथम १४ संघांची प्रत्येकी ७ अशा दोन गटांत (Group A & Group B) विभागणी केली जाईल. साखळी फेरीत प्रत्येक संघ आपल्या गटातील इतर ६ संघांशी एक-एक सामना खेळेल. यानंतर दोन्ही गटांतील अव्वल ३-३ संघ (एकूण ६ संघ) ‘सुपर-सिक्स’ फेरीत प्रवेश करतील. ‘सुपर-सिक्स’ टप्प्यातील सर्वोत्तम ४ संघ उपांत्य फेरीत (Semi-Finals) पोहोचतील आणि विजेतेपदासाठीचा अंतिम सामना २१ नोव्हेंबर रोजी खेळवला जाईल.
कोणत्या संघांना थेट प्रवेश? नामिबियाला खेळावी लागणार पात्रता फेरी
यजमान देश म्हणून दक्षिण आफ्रिका आणि झिम्बाब्वे या दोन देशांनी २०२७ च्या विश्वचषकासाठी आपला थेट प्रवेश निश्चित केला आहे. याशिवाय, आयसीसी (ICC) वन-डे क्रमवारीत अव्वल स्थानी असलेले इतर ८ संघ थेट पात्र ठरतील.
मात्र, तिसरा सह-यजमान देश असूनही नामिबियाला या विश्वचषकात स्थान मिळवण्यासाठी पात्रता फेरी (Qualifiers) खेळावी लागणार आहे. उर्वरित ३ ते ४ जागांसाठीही पात्रता स्पर्धेतूनच संघ निश्चित केले जातील. २०२३ च्या विश्वचषकातील अंतिम सामन्यातील पराभवाचे शल्य मागे सारून, या नव्या फॉरमॅटमध्ये विश्वविजेतेपदाचा दुष्काळ संपवण्याचे भारतीय संघाचे मुख्य ध्येय असणार आहे.
महाईन्यूज-X वर फॉलो करा : महाईन्यूजला instagram वर फॉलो करा
