विद्यार्थ्यांनी अनुभवले गणिताची सृजनशीलता!
शिक्षण विश्व: राष्ट्रीय गणित दिनानिमित्त मोशीतील प्रियदर्शनी स्कूलमध्ये प्रदर्शनाचे आयोजन
पिंपरी चिंचवड | मोशी येथील प्रियदर्शनी स्कूलमध्ये राष्ट्रीय गणित दिनानिमित्त उत्साहपूर्ण वातावरणात गणित प्रदर्शनाचे आयोजन करण्यात आले. या प्रदर्शनाचे संपूर्ण नियोजन व सादरीकरण माध्यमिक विभागातील विद्यार्थ्यांनी केले होते. विद्यार्थ्यांच्या सर्जनशीलतेचा तसेच गणितीय संकल्पनांवरील सखोल आकलनाचा या उपक्रमातून प्रभावी प्रत्यय आला.
प्रदर्शनात विविध मॉडेल्स, चार्ट्स, पझल्स व कार्यकारी प्रकल्पांच्या माध्यमातून भूमिती, भिन्न, मापन, नफा-तोटा, आकार, सममिती तसेच गणिताचे दैनंदिन जीवनातील उपयोग अशा अनेक संकल्पना आकर्षक पद्धतीने मांडण्यात आल्या. विद्यार्थ्यांनी शिक्षक, पालक व पाहुण्यांसमोर आत्मविश्वासाने आपली मांडणी स्पष्ट केल्यामुळे प्रदर्शन अत्यंत संवादात्मक व माहितीपूर्ण ठरले.
हेही वाचा : तळवडे–रूपीनगर प्रभागात राष्ट्रवादीचा जोरदार प्रचार; ‘लाडक्या बहिणीं’चा सक्रिय सहभाग
या उपक्रमामुळे विद्यार्थ्यांमध्ये तार्किक विचारशक्ती, समस्या सोडवण्याची क्षमता तसेच सादरीकरण कौशल्यांचा विकास झाला. गणिताबद्दलचा भीतीभाव दूर होऊन विद्यार्थ्यांमध्ये या विषयाविषयी उत्साह व आवड निर्माण झाली.
प्रदर्शनाच्या संपूर्ण तयारीदरम्यान शिक्षकांनी विद्यार्थ्यांना योग्य मार्गदर्शन व प्रोत्साहन दिले. गणित हा केवळ अभ्यासाचा विषय नसून दैनंदिन जीवनाचा अविभाज्य भाग आहे, हा संदेश या प्रदर्शनातून प्रभावीपणे देण्यात आला. एकंदरीत, हे गणित प्रदर्शन यशस्वी ठरले असून विद्यार्थ्यांसाठी समृद्ध व प्रेरणादायी शिकण्याचा अनुभव ठरला.
