प्रभाग 13 मधील नागरी प्रश्नांची मालिका तीव्र; सचिन काळभोर यांचा महानगरपालिकेला निवडणूकपूर्व ‘अल्टिमेटम’
निगडी, यमुना नगर, साईनाथ नगर, पीसीएमसी कॉलनीतील गंभीर तक्रारी ‘निवडणुकीपूर्वी कायमस्वरूपी तोडगा द्या’ — काळभोर यांची ठाम मागणी
पिंपरी–चिंचवड : प्रभाग क्रमांक 13 मधील समस्या उफाळल्या आगामी महानगरपालिका निवडणूक डोळ्यांसमोर ठेवून प्रभाग क्रमांक 13 मधील प्रलंबित नागरी समस्यांना वेगाने तोडगा काढावा, अशी ठोस मागणी भाजपचे स्थानिक नेते सचिन काळभोर यांनी केली आहे. गेल्या अनेक वर्षांपासून दुर्लक्षित मुद्दे, धोकादायक इमारती, पुनर्वसनातील विलंब, बेकायदेशीर बांधकामे आणि प्राथमिक सुविधांचा अभाव यामुळे नागरिक त्रस्त झाल्याचे त्यांनी स्पष्ट केले.
काळभोर म्हणाले की, “लोकांमध्ये व्यापक असंतोष असून निवडणुकीआधी प्रभागातील सर्व महत्त्वाच्या प्रश्नांवर कायमस्वरूपी निर्णय व्हावा. नागरिकांवर अन्याय होऊ देणार नाही.”
प्रमुख 11 समस्या ज्यावर तातडीने निर्णयाची मागणी
1) निगडीतील JNN पुनर्वसन घरकुल प्रकल्प 14–15 वर्षे प्रलंबित
जवाहरलाल नेहरू राष्ट्रीय पुनर्वसन योजनेअंतर्गत 920 पात्र लाभार्थी आजही घरकुलासाठी भटकंती करत आहेत. प्रकल्प पूर्ण होऊनही लाभार्थ्यांना किल्लेबंदी न मिळणे ही गंभीर बाब असल्याचे काळभोर म्हणाले.
2) पीसीएमसी कॉलनीतील 9 धोकादायक इमारती — नागरिक जीव मुठीत घेऊन राहत
८६ फ्लॅटांच्या ९ इमारती गंभीरपणे जर्जर स्थितीत असून दारे, खिडक्या, भिंती तुटलेल्या; जिने कोसळण्याच्या स्थितीत.
नागरिकांना तातडीने पुनर्वसन करून नवीन इमारतीत सुरक्षित घरे देण्याची त्यांनी मागणी केली.
3) अण्णाभाऊ साठे वसाहत — 256 फोटो पास धारकांना घर देण्याची मागणी
वर्षानुवर्षे प्रतीक्षेत असलेल्या रहिवाशांना नवीन इमारत मिळावी, असा आग्रह.
4) काळभोर गोटा — भाजी मंडईतील गाळे तत्काळ वाटप करा
स्थानिक लघुव्यापाऱ्यांच्या उपजीविकेसाठी मंडईतील गाळ्यांचे वाटप तातडीचे असल्याचे त्यांनी सांगितले.
5) साईनाथ नगर — बेकायदेशीर घरे नियमित करून स्थायी मालकी हक्क द्या
पिंपरी–चिंचवड नवनगर विकास प्राधिकरणाच्या जमिनीवरील रहिवाशांना स्थायी हक्कांची मागणी.
हेही वाचा : सोसायटी फेडरेशनतर्फे भव्य सर्वरोग महाआरोग्य शिबिराला उदंड प्रतिसादाची अपेक्षा
6) मधुकर पवळे उड्डाणपूलखालील भोसरी बसस्टॉप पुनर्स्थापित करा
ट्रॅफिक कोंडी आणि सुरक्षेच्या दृष्टीने बसस्टॉपचे योग्य ठिकाणी स्थलांतर आवश्यक असल्याचे त्यांनी सांगितले.
7) निगडी गावठाण — व्यायामशाळा, जीम व भाजी मंडईची मागणी
युवा, महिला आणि नागरिकांसाठी मूलभूत सुविधा उपलब्ध करून द्याव्यात.
8) यमुना नगर — बीजी शिर्के कंपनीची इमारती व बैठी घरे नियमित करा
बेकायदेशीर बांधकामांमुळे नागरिकांना विविध अडचणींना सामोरे जावे लागत आहे.
9) यमुना नगर आणि इतर वस्त्यांमध्ये ओपन जीम सुरू करा
आरोग्यविषयक सोयी वाढवण्यासाठी ओपन जीमची गरज असल्याचा आग्रह.
10) सेक्टर 22 — JNN घरकुल इमारतीतील सतत जळणाऱ्या केबल्सचे संकट
केबल जळाल्यानंतर चार–पाच दिवस लाईट बंद राहते. कायमस्वरूपी दुरुस्तीची मागणी.
11) सेक्टर 22 — SRA प्रकल्प रद्द करा; नागरिकांमध्ये संभ्रम
“माजी नगरसेवकांनी बिल्डरांना हाताशी धरून सामान्य नागरिकांना वेठीस धरले आहे. त्यामुळे SRA प्रकल्प तत्काळ रद्द करावा,” अशी ठाम मागणी.
काळभोर यांची महानगरपालिकेला स्पष्ट चेतावणी
काळभोर यांनी सांगितले की, “प्रभागातील लोकांचा संयम सुटला आहे. निवडणुकीपूर्वी निर्णय झाले नाहीत तर आंदोलन करण्यास भाग पाडले जाईल.”
